*Ta premira un recuperacion di 76 % pa fin di 2021 - ORANJESTAD (AAN): CEO di Oficina di Turismo, Ronella Croes a indica cu pa loke ta trata turismo ta visibel tambe cu cosnan ta moviendo den bon direccion.
Ta finalisando e cifranan pa luna di Juni, pero ta kere cu pa Juni, ta e prome luna desde reapertura di turismo pa Aruba, cu ta mira un luna cu ta surpasa 80 mil bishitante.
Ta spera pa ta exacto den luna di Juni, un total di 85 mil bishitante. ATA a papia di un proyeccion pa final di 2021 di 68 % di recuperacion di turista compara cu 2019. Aworaki tin'e na 76 % di recuperacion, tambe compara cu 2019 pa loke ta trata cantidad di bishitante, Ronella Croes a bisa. El a enfatisa cu esaki ta basta significante ya cu den un luna a ahusta hopi mirando e resultadonan y e grado di recuperacion y e velocidad di esaki pa loke ta trata Aruba su turismo.
