Kathy Paskel, directora di DIMAS:
*Mientras tanto tin 50% menos personal
ORANJESTAD (AAN) – Kathy Paskel, directora di DIMAS a duna di conoce cu personal di DIMAS, cu a limita, a traha hopi duro, mientras cu e cantidad di peticionnan a aumenta cu casi 20%.
Esaki apesar cu e personal di DIMAS a bira menos debi na sea vergrijzing, of empleado cu a fayece durante Covid-19, of hende cu a bay cu VUT. Esaki a haci cu e personal di DIMAS ta na 50% desde cu nan a cuminza te awo.
“Cu e personal cu nos tin nos a atende cu e volumen, y segun nos cifranan nos falta 68 caso cu pa un of otro motibo no a keda procesa, pero esey ta un porcentahe hopi minimo.
Tur otro a haya un contesta positivo of negativo, of a haya un carta pa haci un proceso di VTA, unda cu mester haci ainda screening medico, y ora esaki drenta ainda falta un parti pa finaliza, y tin casonan cu e hendenan a haya ‘bijbetaling’ pero nan no a haci e pago. Nos ta manda bijbetaling na hende cu a keda un aña sin pidi permiso, anto nos ta manda un cobranza adicional di 625 florin y tanten esey no wordo paga e permiso no ta release. Dus, algun hende nos ta pendiente di e pagonan ey, tin algun beschikking cu ta cla pa manda, asina cu e parti di e cliente ey keda efectua”, señora Paskel a indica.
El a señala cu DIMAS ta hopi contento cu nan por a culmina 2024. “Pa 2025 te awo, nos tin 5.365 peticion, y esey pa duna indicacion cu e trend di aña pasa cu el a subi y lo sigui e aña aki, nos ta trahando cu locual cu a drenta y tur tin nos atencion pa cu esaki”, Kathy Paskel a relata.
El a agrega cu nan ta bezig cu minister pa algun intervencion den ley, unda cu hunto cu sector priva nan ta bay wak si nan por traha riba partnerschap, pa wak si nan por cera un permiso, por ta di mas cu un aña, pasobra ta conoci cu e mercado no ta bay produci e hendenan pa ocupa cierto posicionnan, y esey ta e intervencionnan cu DIMAS ta trahando riba dje.
