Presidente di Parlamento Edgard Vrolijk:
ORANJESTAD (AAN) – Presidente di Parlamento, mr. Edgard Vrolijk, cu nan a toca den IPKO e Ley di COHO, y for di Mei ultimo e parlamentarionan a manda e preguntanan pa Hulanda, pero te dia di awe, nan no a haya contesta.
Vrolijk a indica cu nan ta bezig cu gobierno riba otro area, pero Parlamento no a haya ni un contestacion riba nan preguntanan. El a agrega cu IPKO na e momento cu a tuma lugar, tabata e plataforma pa haya informacion, pero tambe pa busca cosnan cu mester wordo cambia.
En dado caso un di e aspectonan cu parlamentarionan a toca den IPKO ta e mesun COHO, su procedure y e RAft. Den esey nan a trata seis punto cu ta bin den e “afsprakenlijst” cu ta disponible unda cu a pone den dje cu na momento cu gobierno mester bin cu un Ley di Consenso, e mester tene cuenta tambe cu Parlamento.
Presidente di Staten mr. Vrolijk a subraya cu den e proceso ey mester tene cuenta cu e escogencia di e pais. E pais ta liber di scoge e relacion di trabao cu e kier haci cu Hulanda, y no manera cu a wordo impone aworaki.
A wordo palabra den reunion di IPKO cu mester tin respet pa e autonomia di e pais, y den e caso aki mester por involucra Parlamento den su totalidad den esey y ora por papia di un Ley di Consenso; pero un biaha mas, e escogencia ta di e paisnan. Esaki a wordo ratifica y esaki mester ta habri, unda nan por negocia cu otro y e escogencia di e relacion di trabao ta na e paisnan, mr. Vrolijk a reitera.
Presidente di Parlamento a expresa cu tur hende ta di acuerdo cu e parti aki a bay malo, nan ta conciente di esey, y nan ta trahando pa den futuro, e relacion bay miho; pues, si ta papia di relacionnan duradero den Reino esaki ta un di e aspectonan.
