Minister Ursell Arends categoricamente a bisa:
ORANJESTAD (AAN) – Siguiendo cu e conferencia di prensa di Minister Ursell Arends, Diaranzon ultimo, relaciona cu e accion masal di taxistanan diamars cu a pasa, e mandatario a bisa cu el a haya necesario pa haci cambionan inmediatamente, pa loke ta concerni traspaso di vergunning.
Minister Arends a acentua cu e no ta bay permiti pa ni un tiki corupcion tuma lugar. “Si e unico solucion ta pa stop e sistema cu tin ‘integriteit risico’ e ora ey no tin nada di discuti mas, pasobra kico ta bay discuti? Bo no por ta mitad integro, bo ta integro of bo no ta integro” Arends a reitera.
Minister Arends a señala cu pa loke ta trata integridad di full e sistema aki, e ora ey mester coregi loke a bay robes durante añanan, decadanan.
Arends a bisa cu e decision real tabata: 1. Pa loke ta trata para pa integridad y alavez pa crea oportunidad igual pa tur ciudadano den nos comunidad.
E dignatario a referi tambe na e dialogo cu su persona tabata tin cu representante di e grupo di taxista, p’asina aki e comunidad por compronde kico ta e ponencia cu nan a trece pa dilanti.
Minister Arends a bisa cu locual e taxistanan kier, ta keda cu e derecho pa traspasa e vergunning pa nan yiunan, y hendenan di nan confianza, dus, “extended family”.
“Nan a presenta un articulo cu segun nan, ta haci e permisonan ‘eigendom’. Esaki absolutamente, no ta corecto. Un otro sugerencia cu nan a presenta, ta pa nan keda cu e permiso te dia cu nan muri, y haci uso di un helpchauffeur. Actualmente caba, taxista tin 165 taxi vergunning y un total di 195 helpchauffeur. Nan ta helpchauffeur cu no por yega na un vergunning, pero si por traha pa un vergunninghouder y mester paga esaki entre 80 pa 120 dollar pa dia, pa opera e taxi. Pues, esaki ta ora nos ta papia ‘di toco den toco’.
