BOGOTA: Ministro di Salud y Proteccion Social, Carolina Corcho a confirma na Colombia den fin di siman, cu tur ciudadano y bishitante na e pais tin di bolbe cuminza usa tapaboca di forma obligatorio.
E medida nobo aki ta tuma na cuenta tambe, e cantidad di caso cu tin na e pais y cu ta subiendo hunto cu contagionan di Covid-19, esta influenza (griep), y tambe adenovirus.
Siman pasa so, Colombia a registra un total di 3.252 caso nobo di Covid-19. Esey ta 1.140 caso mas compara cu dos siman pasa.
Segun e Ministro, e chens ta grandi cu Colombianonan lo bay celebra Pasco y tambe Aña Nobo cu tapaboca bisti. E tapaboca ta bira obligatorio pa tur hende riba 2 aña di edad den espacionan habri y cera cu aglomeracion di hende. Ta obligatorio den transporte publico, centronan comercial, clinica y hospitalnan.
Gobierno di Colombia a indica cu e cifranan di contagio di ultimo cuatro siman tabata alarmante, y esey a habri caminda pa cuminza obliga tur hende pa cuminza cana cu nan atrobe riba nan cara.
Nan ta admiti cu e cantidad di hende cu ta buscando vacuna a bira menos. Na Augustus nan a duna 1.130.173 dosis di vacuna. Na September esey a baha te na 510.952, y na Octuber a sigui baha te na 492.555 vacuna.
Gobierno Colombiano ta pidi tur ciudadano pa revisa nan schedule di vacuna pa sigura cu nan tin tur booster shots.
Pa colmo net ora cu ta temporada di fin di aña, for di e punto di bista epidemiologico, tin semper e riesgo halto cu mas hende ta interactua cu otro, y ta aglomera, y tur esaki ta empuha pa casonan di contagio ta sigui subi.
