Marlon Sneek, Presidente di Parlamento:
ORANJESTAD (AAN)-- Presidente di Parlamento, señor Marlon Sneek, den entrevista cu Matutino DIARIO, a expresa cu tur hende ta papia di e “Ley di HOFA”, pero tanten cu un producto di Ley no yega Parlamento, no tin un Ley.
“Nos ta den loke nos ta yama e ‘wetgevings process’. Gobierno ta traha un Ley, ora e ta caba di trah’e e ta mand’e na Raad van Advies di Aruba, Raad van Staten na Hulanda, ora cu e advies ey ta wordo duna, gobierno mester procesa e advies ey, atende cu ne, wak kico nan ta bisa cu ta e puntonan cu nan lo por of no lo por, y gobierno tin cu cambia e ley basa riba e advies aki. Ora cu e proceso aki keda cla, e ora ey e ta bin Parlamento. Ora e yega Parlamento, e ora ey, tin un discusion di con ta bay duna contenido, con ta bay contesta e adviesnan aki, mirando cu tin consehonan cu ta papia di articulonan cu ta hinca den e ley, cu ta infringi cu areglonan di Estado, kiermen, e contestanan mester wordo duna na Raad van Advies y Raad van Staten riba nan ponencianan, anto ora cu esakinan caba di tuma lugar e ora ey Parlamento ta haya e documento, y nos por bisa cu tin un ley di Hofa den Parlamento, pa wordo trata y bay vota riba dje”, Presidente di Parlamento, Marlon Sneek a remarca.
Marlon Sneek a bisa cu na e momentonan aki e Ley no a yega Parlamento, e no a yega Tweede Kamer, kiermen e no ta un ley, e ta un concepto den discusion den e gobiernonan tanto di Aruba como di Hulanda, mirando cu ta bay tin un Landsverordening y un rijkswet. “Y manera a wordo bisa caba, si e Landsverordening no pasa, nos no tin un rijkswet y si esaki no pasa y e Landsverordening si, tampoco nos no tin un Ley. “E ta un concepto, manera nos ex-premier a bisa, e ta un rijkswet hibrido unda cu tin e rijkswet y tin un Landsverordening, si nan dos no pasa no tin nada. Pues eynan nos ta wardando e producto final, y si e producto no yega Parlamento, tanten cu esaki no sosode, nos no tin un ley”, Presidente di Parlamento, señor Marlon Sneek a enfatiza.
