Sharine Croes-Dubero, coordinador Facilidad Estudio:
ORANJESTAD (AAN) – Sharine Croes-Dubero, Coordinador di Facilidadnan di Estudio y Arubalening, na Departamento di Enseñanza, a menciona den entrevista cu DIARIO, cu hopi hoben no ta sinti nan mes prepara ainda pa sali for di Aruba pa bay studia afo.
Croes-Dubero a splica cu claramente nan no a haci e parti di informacion extenso, e aña aki. “Nos ta bay cuminza cu e grupo cu lo bay otro aña (2025-2026). Nos tin un plan pa e aña aki pero pa motibonan financiero nos no por a sigui cu ned. Pero e plan ta pa cuminza prepara nan for di September pa ora cu nan subi avion na Augustus nan ta miho prepara, riba diferente aspecto, vooral e parti emocional, nos kier traha mas riba dje, pasobra hopi studiante ta pega ora cu nan yega ay’abao, door di e parti di heimwee, y psicologicamente, nos tin hopi situacion cu esey, y nos ta tratando di drecha e parti ey mas miho pa nos studiantenan”, Sharine Croes-Dubero a señala.
El a agrega cu den esey, Departamento di Enseñanza ta trahando hopi estrecho cu Arubahuis, y e ta haya cu esey ta un bon desaroyo e aña aki, pa hunto por yega na solucionnan y na e miho preparacion for di Aruba pa ora nan yega Hulanda.
VIVIENDA:
Croes-Dubero a bisa cu pa loke ta vivienda, e tin entendi for di Arubahuis cu nan tin un deficit, pero no solamente pa e studiantenan di Aruba pero pa esnan di Hulanda tambe. “Nan ta trahando riba esey, ta purbando di wak con pa soluciona esaki.
Tin varios studiante cu si ta hayando camber pero e problema ta keda e tres lunanan di down payment, pa nan por wanta e camber y no tur hende tin e placa pa paga esey. No ta purbando di acelera e proceso di nos pa nan por haya e cen pa nan por haci esey. Pues, den parti nos ta purbando di yuda y Arubahuis tambe ta purbando di yuda e studiantenan, aunke eigenlijk e ta algo cu normalmente nos no ta haci sino cu e studiante mes ta hacie, pero ta purbando di yuda nan pa nan por haya nan camber”, Sharine Croes-Dubero a señala.
