Parlamentario Otami Thomasia di AVP
- Continuidad di cuido y bienestar di mama y baby ta prioridad
ORANJESTAD (AAN): Despues di e reunion di e siman aki cu Asociacion di Partera, e parlamentario di AVP ta enfatisa e necesidad pa atende e situacion preocupante di cuido di partera na Aruba. E reduccion den cantidad di partera ta exigi claridad y medidanan concreto pa garantisa continuidad di cuido pa mamanan y babynan.
Segun informacion comparti durante e reunion, Aruba a pasa di ocho pa cuater partera. Ademas, tin preocupacion cu pa september 2027 por keda solamente tres partera pa henter Aruba.
“Si nos sa cu den menos cu un aña nos por keda cu solamente tres partera, nos no por spera te ora cu e problema bira un crisis. Nos conoce e preocupacionnan; awor ta tempo pa traha na solucion,” Thomasia a declara.
Servicio Disponibel Dia y Anochi: Pa e parlamentario, e situacion ta bay mas leu cu solamente un escasez di personal. E ta toca continuidad di cuido, condicionnan di trabao, organizacion di servicio y siguridad di mama y baby.
Thomasia a remarca cu cuido di partera mester ta disponibel 24 ora pa dia, shete dia pa siman. Un parto no ta limita na orario di oficina. Ora cantidad di profesional baha, e responsabilidad ta wordo reparti entre menos hende, cu mas presion di trabao y menos oportunidad pa descanso y recuperacion.
“Nos parteranan ta carga un responsabilidad enorme. Nos mester evita cu nan ta yega na un punto di agotacion, mientras nan ta atende salud y bienestar di mama y baby. Cuida esnan cu ta cuida nos ta forma parti di un servicio di salud responsabel,” el a expresa.
Preguntanan pa Claridad: Den cuadro di su labor parlamentario, Thomasia a presenta preguntanan oficial na Ministro di Salud, drs. Melvin Wyatt-Ras, tocante e situacion. Cu esaki, e ta busca claridad riba e obstaculonan cu parteranan ta enfrenta, e posicion di AZV y e medidanan concreto cu gobierno ta dispuesto pa tuma pa evita cu e situacion empeora.
E reunion di e siman aki cu AZV a forma parti di e tratamento parlamentario di e tema. Pa Thomasia, e informacion y preocupacionnan presenta mester conduci na un siguimento concreto, cu atencion tanto pa necesidadnan inmediato como pa continuidad di e servicio den futuro.
“Reconoce e problema no ta suficiente. Nos no por keda solamente cu reunionnan, preocupacionnan y declaracionnan. Nos mester pasa di preocupacion pa accion y di accion pa solucion,” e parlamentario a subraya.
Thomasia a conclui cu e pregunta central no ta solamente cuanto partera Aruba tin awe, sino con lo garantisa cu mamanan y babynan sigui ricibi e cuido sigur y di calidad cu nan merece.
Den e segundo parti, Thomasia lo profundisa den e tema y e necesidad di solucionnan pa fortifica cuido di partera na Aruba. Nos ta invita comunidad pa sigui lesa y mantene informa tocante e asunto importante aki.
