Abuso historicamente ta parti di un mundo cu a perde control --- *Den pasado famia tabata bende mucha cu homber cu placa --- *E frustracion di un pedofiel ta mata futuro di inocentenan
ORANJESTAD(AAN)—Atrobe Aruba ta registra un caso di abuso sexual di menor di edad.
Un desaroyo cu tin henter mundo preocupa aparentemente aunke por nota cu henter mundo no kier realisa, cu e ta bolbe na puntonan di salida cu a habri porta situacionnan cu a haci cu hende a destrui su mes.
Pedofiel no ta algo nobo. Si bolbe den historia, mester conclui cu pedofiel ta parti di e pakete di abuso cu mundo no kier a atende manera mester ta, pero hasta a uza pa haci negoshi pa duro cu e realidad aki por ta.
Historia ta keda e mihor guia di hende, cu por bolbe na e civilisacion Griego, caminda na e isla Kreta tabata topa cu loke cientificonan ta yama Pederastia.
Ta trata aki di e sistema cu un mucha homber pober, tabata wordo acepta como “homber”.
A base di un acuerdo cu famia, un homber tabata bay cu un mucha homber menor di edad, cu tabata introducie na bida di luho. Si e mucha a keda contento cu e bida aki, nan tabata bira pareha.
Pederastia ta e nomber cu tabata duna e relacion aki, cu tabata algo normal den sociedad cu ta acepta esaki abiertamente.
E nomber cu awe ta duna e costumber aki, ta cay hopi bez bou di pedofiel pero realmente ta mescos.
Ta duro pa bisa pero na hopi pais na mundo, mayornan ainda ta entrega nan yiu menor di edad na hombernan of muhernan cu por abusa di nan.
E lagrimanan di e muchanan, no ta importante y na hopi pais mucha homber y muher no ta realisa kico ta pasa cu nan y cu nan ta solamente obheto cu ta produci placa pa nan famia.
Nan no tin balor di nan mes loke no semper ta producto di falta di placa, pero demasiado bez, resultado di educacion cu un mucha ta ricibi na su cas.
Mientras nos ta lamenta loke ta pasa cu yiunan di hende cu si ta percura pa e mucha tin proteccion, realdidad di mundo ta duna prueba, cu mucha den hopi caso ainda ta wordo uza pa produci placa pa nan mayornan y famianan.
Pedofiel segun ciencia ta un enfermedad. E persona ta wordo atrae dor di e mucha y e no por contene su mes segun ciencia.
Si nos sigui e pensamento aki, un pedofiel ta mescos cu un asesino di serie, cu no por mira hende sin haya e sentimento cu e mester mata e persona.
Esaki ta nifica cu un pedofiel ta sumamente peligroso, pasobra e ta haci un mucha su obheto aunke esaki por destrui e mucha.
Mester acepta cu tin pedofiel. Mester acepta cu tin hende cu tin e enfermedad. Hende enfermo, cu no por wordo uza pa cera porta pa realidadnan cu muchanan rond mundo ta trece dilanti y cu ta papia palabra cla di e forma con muchanan ta wordo abusa dor di hende cu ta uza droga y cu ta entrega placa na mayornan cu ta bende nan yiu.
Na paisnan grandi cada rato por tende mas di e forma cu muhenan ta entrega nan yiunan na hombernan cu ta nan homber tambe y mayornan ta bende nan yiunan cu hende, cu por entrega nan placa.
Awe pedofiel ta uno di e realidadnan cruel na mundo. Pero mester cuminsa atende pedofiel como cruel y mira e loke e ta produci pa mucha inocente, cu no por defende nan mes.
Si di berdad nos ta un mundo cu a conoce progreso, hende mester cuminsa demostra cu e no ta primitivo y stop di uza muchanan pa pornografia, pa prostitucion infantil cu ta uno di e realidadnan mas cruel cu hasta mayornan ta comete na mundo pa placa y nada mas!
