Diasabra awor na San Nicolas
- Varios control gratis riba e dia aki na Colegio San Augustin
ORANJESTAD (AAN): Den oranan di atardi na sede di Aruba Lions Club den Engelandstraat, a convoca un conferencia di prensa pa anuncia cu Diasabra awor lo bay tin nan di dos Feria di Salud na San Nicolas. President di e club, Edmar Lopez a cuminza ta gradici director Jeffrey Kelly di Colegio San Augustin MAVO na San Nicolas pa duna cooperacion pa asina e sede di e scol aki por wordo uza pa e Feria di Salud.
Colegio San Augustin MAVO ta riba Pastoor Hendrikstraat, y su entrada ta como 330 meter pariba di e porta principal di Joe Laveist Sportpark, banda panort di caminda. Aña pasa e Feria di Salud tabata bon bishita, y Aruba Lions no ta duda cu e biaha aki lo ta diferente.
Lopez a splica cu manera ta costumber, na e Feria lo tin e team Medico di Xavier University mas nan studiantenan cu ta participa y guia e proceso. Mary Joan Foundation tambe lo tey pa esnan cu kier informacion y guia den e proceso pa cu e malesa di cancer di pecho, tanto pa hende muhe como hende homber.
Edmar Lopez a agrega cu Aruba Vision Center lo tey pa yuda controla bista di esnan presente. Quota International Aruba hunto cu FEPOH, ta bay riba e tereno di cuida y informa comunidad di nos oido nan. Pa e Feria di Salud tambe lo bay conta cu e Fundacion Smile Mobile cu ta duna servicio na tur e grandinan cu tin nan implante di djente y mester un clean-up of reparacion chikito. Por pasa libremente y nan lo duna e servicio riba e dia aki, y por pasa libremente trempan y laga e implante di djente cerca e asistente di Smile Mobile dunando un nomber y number di celular pa mas laat durante e mainta por pasa pick-up esaki sin ningun gasto.
Segun e president di Aruba Lions Club, tur nan servicionan riba e dia aki lo ta completamente gratis.
Lopez a mustra cu e biaha aki, pa promer biaha nan lo tin Fundacion ABO pa cual nan ta sumamente contento cu nan ta forma parti na e Health Fair como cu nan trabao ta importante y tur ciudadano mester ta bon informa y siña conoce nos curpa na momento cu sinti problema di tripa.
Aruba Lions Club a mustra cu nan ta sumamente contento di por brinda e nan aki na comunidad di Aruba y di San Nicolas en particular. Lo tin oportunidad pa check: (*) Cholesterol. (*) Presion di Sanger. (*) Sucu. (*) Oido. (*) Bista. (*) Control di Pecho/Tripa. (*) Limpieza di dentadura falso (protesis dental).
Aruba Lions Club ta extende un invitacion na comunidad pa presenta nan mes Diasabra, 23 di Mei na
Colegio San Augustin MAVO entre 8:00 am y pa 12:00 pm. Lopez a reitera cu no mester di haci cita y tur checkup ta gratis. Pero si e ta recomenda pa bay trempan.
