Minister di Husticia, Rocco Tjon:
ORANJESTAD (AAN): Minister encarga cu e cartera di Husticia, Rocco Tjon, a indica dialuna den conferencia di prensa cu tin un departamento encarga cu e peticionnan di asilo. Ley ta splica con tin cu atende cu esaki.
E mandatario a laga sa cu mester entrevista e personanan cu a solicita asilo. Esaki ta mara na cierto criterianan riba ki ora un persona ta bin na remarke y riba ki ora no.
E departamento aki ta trata pa mas lihe posibel contesta e peticionnan cu ta drenta. Esey ta un obligacion, a remarca.
Sin bay den detayenan di casonan specifico, tin hopi reto pa cu esaki ya cu tin bes tin personanan cu ta haci un peticion pa asilo, nan ta wordo nenga, nan ta wordo deporta y nan ta bolbe drenta Aruba via un manera ilegal. Nan ta bolbe haci un peticion pa asilo.
Ora ta trata di yega na e persona por haci e entrevista, pa wak su historia, no por localis'e. Esaki ta nifica cu tin diferente reto pa e team cu ta encarga cu esaki, a bisa.
E team aki ta bao encargo di otro minister. E parti di asilo no ta cay bao di Husticia, pero den e forma ey ta trata pa den e cadena di husticia, stranheria y asuntonan general, purba pa na un manera mas lihe y eficiente atende cu tur e peticionnan cu ta drenta, Minister Rocco Tjon a expresa.
