Misha Raymond, Lider di fraccion Raiz, cu carta na Minister di Labor
ORANJESTAD (AAN): Dia 5 di september, Parlamentario y lider di fraccion di Raiz, Misha Raymond, a dirigi un carta na Minister di Labor sr. Glenbert Croes relaciona cu salario minimo.
Na Aruba, salario minimo ta wordo stipula como un suma pa luna of un suma semanal. Sinembargo, legalmente un siman ‘completo’ di trabou por consisti di 40 pa 45 ora pa siman. Esaki ta significa cu un persona cu ta traha 45 ora pa siman por wordo paga mesun suma total di salario minimo, cu esun cu ta traha 40 ora pa siman.
E resultado di esaki ta cu esun cu ta traha mas ora, ta cobra menos pa ora.
Den e carta dirigi na Minister Croes, Misha ta propone na e Minister pa cambia e forma cu ta stipula e salario minimo pa un sistema na unda e salario minimo ta basa riba un tarifa pa ora (minimumuurloon).
Tambe Misha ta puntra e minister si e ta comparti e opinion cu salario minimo mester wordo aumenta, considerando e bestaansminimum, inflacion, poder di compra, y pa preveni pago inhusto.
