Director di EPB Hato, señor Erwin Lopez
ORANJESTAD (AAN): EPB ta un scol great. Esaki ta loke maestronan di EPB a vocifera recien den un entrevista pa anuncia nan Openavond cu lo tuma luga diaranson dia 29 di april. Director di EPB Oranjestad na Hato, señor Erwin Lopez a remarca cu durante e anochi aki, EPB Oranjestad lo habri porta pa tur mucha di scol basico y di Mavo pa asisti na e anochi aki pa haya un bista na tur loke EPB tin pa ofrece nan, kico tur por siña na EPB y con great e scol ta.
“Apesar di loke ta scucha eyfo di scol secundario EPB, e scol ta un scol master, hopi dushi y cu hopi ambiente y sigur”, e director a enfatisa.
Durante e anochi di Openavond, cada unit di EPB lo tin boothnan na unda cu por haya informacion di tur loke e scol ta ofrece. Tambe lo haci simulacionnan den e diferente ofishinan y di loke examennan ta encera, lo duna informacion di stage, algun alumno cu a gradua caba lo informa tocante nan logronan despues di a caba EPB, y lo duna guia riba kico por haci despues di caba EPB. Lo tin oportunidad pa conoce y combersa cu e docentenan y algun alumno di e scol.
E Openavond lo tuma luga na EPB Hato diaranson awo, dia 29 di april for di 6 or di atardi pa 9 or di anochi. Pa mas informacion, por bay riba paginanan social di EPB.
