ORANJESTAD (AAN) — Filomena College MAVO ta den su celebracion di su 75 aña di existencia. Den conferencia di prensa a duna informacion tocante e celebracion aki. A hiba palabra e cabesante Raquel Lampe, Juffrouw Daniela Carrion y e director Adhunto Joraine Oduber.
Juffrouw Lampe a expresa lo siguiente: “Cu esaki mi kier cuminza pa bisa cu nos tin un tremendo, tremendo celebracion pa nos 75 aña, cu ta yama ‘Tempo di Filomena’ y esaki ta un fiesta di gala, cu lo tuma lugar dia 25 di Juni, na Marriott Resort for di 9 or di anochi te 2 or di marduga”, director sra. Lampe a informa.
El a agrega cu, di mes, pa nan celebra esaki manera mester ta, ta bay wordo acompaña pa dos tremendo banda musical cu ta Robert cu su Solo Banda Show y Musical Time.
Lampe a expresa cu e lo ta un anochi tremendo, pasobra e celebracion aki di 75 aña di Filomena College no ta algo pa laga bay sin mas, sin organiza un evento grandioso pa henter e pueblo di Aruba y asina aki, no solamente pa haci e fundraising pa duna bek na e muchanan, pero tambe pa bin hunto como e Famia di Filomena, cu ta e ex-alumnonan, ex-coleganan, mayornan, tur amigo di Filomena College. Carchinan ta obtenible na scol.
META DI E FUNDRAISING:
Juffrouw Lampe a splica cu un di e metanan principal cu nan tin, pa organiza e fundraising, ta cu nan kier yega na un gymzaal, cu ta algo cu scol no ta dispone di dje, pa asina e docentenan di gimnasia y tambe e alumnonan, pasobra tin biaha e alumnonan tin demasiado energia, y nan kier haci algo hunto, manera hunga futbol di sala, of basketball, pero nan no tin caminda pa haci esaki.
“Pues tur loke nos ta haya for di e fundraising aki, ta pa nos hinca bek den nos alumnonan, no solamente den nos alumnonan di forma directo pero tambe den forma indirecto, door di entrena nos team cu un curso special, cu nos ta bezig cune caba, cu un grupo di Hulanda, unda cu nos ta bezig cu e ‘talent ontwikkeling’ di nos muchanan den cada les, con nos por saca e miho di nos alumnonan”, e cabesante señora Lampe a duna di conoce.
