ORANJESTAD (AAN) – Durante e conferencia di prensa semanal di gobierno, Minister Xiomara Maduro a referi tambe na Departamento di Asuntonan Economico,
cu ta keda constantemente traha riba e pronosticonan, y na Mei ultimo nan a publica nan “Economic Outlook”.
Den e “Economic Outlook” aki gobierno a haya un bista desde 2014 bin ariba, con Aruba su economia a traha, y por wak claramente cu aña pasa, e tabata tin un caida grandi cu a resulta den un 25%.
Bayendo bek na e prome instante, ora cu e pandemia a manifesta su mes, gobierno a premira un caida di 44% pero el a resulta menos, esta 37%, segun e dignatario a splica.
Pero debi cu a duna e yudanza den forma di subsidio di salario, e 4.000 florin pa cuartal na empresanan chikito, pero tambe a brinda alivio fiscal y cu ademas tabata tin e banconan cu a yuda cu e moratorium riba hipoteca y otro prestamonan cu a duna un break riba nan, tur esaki banda di e hecho cu hopi compania grandi di Aruba a busca placa di afo pa asina yuda nan empresanan, nan por a keda riba pia, y e hecho cu gobierno a inverti mas di 400 miyon den comercio, pa asina por mantene esaki, aunke e sla di covid-19 ta asina grandi cu a cera frontera, toch Aruba su economia, door di tur e yudanzanan aki a mustra su resiliencia y esaki a keda traduci na un caida di 25.2%.
Pero tambe por mira cu e aña aki, door cu e turistanan ta biniendo bek, cu nos pais ta safe, y nos comunidad a uni pa tene su mes na e reglanan di salubridad pa cuida nos mes, a logra cu nos economia a keda lora y nos recuperacion ta biniendo bek, y nos pida baranca ta mustra su resiliencia cu ta manifesta su mes cu un crecemento di 5.2% di nos GDP pa e aña en curso.
E datonan aki ta basa riba e pronostico di mas modesto posible, asina yama “cautiously optimistic. Kiermen, gobierno ta optimista pero ta keda cu cautela.
E mandatario a bisa cu den e escenario di “cautiously optimistic” si tuma e turistanan cu ta bin cu avion, esaki ta wordo premira cu e ta bay ta 57%, pero na e momentonan aki por mira cu esaki ta caba na 55% . Kiermen, Aruba ta bay pasa esaki y lo caba somewhere banda di e escenario optimista, cu ta 70% di e turistanan cu ta bin cu avion. Te aworaki e pronostico ta na 68%, pues e ta cerca caba di e escenario optimista.
E ta wordo premira cu pa otro aña e crecemento di nos economia lo ta na 6.2% y na 2023 lo yega na un crecemento ainda mas grandi: 10.8%, e dignatario a subraya.
