David Barkmeyer, director di Meteo:
ORANJESTAD (AAN) – Den entrevista cu DIARIO, señor David Barkmeyer a elabora riba e temporada di horcan y e pronosticonan cu ta wordo duna, internacionalmente.
Meteo Aruba ta sigui pronostico di CSU (Colorado State University) cu pa hopi aña caba ta esun di mas exacto. CSU a duna di conoce cu e aña aki ta bira un temporada di horcan hopi mas activo cu normal.
“Si mi bisa hopi mas activo pasobra, por ehemplo, e ta premira 23 storm, cu normalmente ta 14.4. CSU ta premira 11 horca, mientras cu normal ta 7. Horcan mayor tin 5, normal ta 3. E ta un poco hopi”, Barkmeyer a señala.
El a agrega cu e pakico ta e dinamica di e atmosfera, y ademas e mas principal ta cu nos ta den un ENSO (El Niño–Southern Oscillation) na unda el Niño ainda tin un tiki anomalia, pero aparentemente ta bayendo den e trend cu e ta bay bira neutral, anto cu den e proximo lunanan nos ta bay haya un manifestacion di La Niña.
Esaki ta nifica ta causa loke ta accionnan ciclonico den e parti di Atlantico. La Niña, al contrario, ta manifesta su mes y mas tanto, awacero e ora ey. Barckmeyer a subraya cu tur cos ta sinta asina aki, cu cualkier tormenta cu pasa cerca di bo isla of riba bo isla, el ta daña tur e temporada pa nos.
“Nos tin cu wak ki tempo La Niña ta bay manifesta su mes, aworaki nan ta pensa cu pa e di dos parti di e ‘hurricane season’ bo ta haya cu La Niña ta bay manifesta su mes cu e ta bay influencia e temporada di horcan. Den ki grado e ta bay influenci’e? Tambe nos tin cu wak, ki tempo e ta bay manifesta su mes mas tanto anto cu ki intensidad”, director di Meteo a splica.
El a acentua cu nos ta acercando na e lunanan di mas calor di aña, unda cu normalmente Meteo sa saca un boletin, pa adverti tocante e temporada di calor den e lunanan di Juli, Augustus y September; anto, parti di October tambe.
“Na su debido tempo mi ta saca esaki atrobe, pa recorda e comunidad; despues di un par di luna un recordatorio atrobe, pasobra e hendenan tin e tendencia di lubida”, señor Barkmeyer a señala.
