Gino Goeloe, director di WGK:
ORANJESTAD (AAN) – Director di Wit Gele Kruis, señor Gino Goeloe, den entrevista cu DIARIO a menciona, cu e plan cu WGK haya un local den Directie Ouderenzaken, aworaki cu tin un director nobo den e persona di señora Desiree Helder, cu ta bay traha hunto cu Departamento di Asunto Social, y DVG.
Goeloe ta kere cu si e departamentonan aki traha hunto, mester bira uno cu ta Directie Ouderenzaken. Pues, e ta kere cu esey ta bay bira e plan tambe, unda cu den futuro na un local nan ta bay. “Directie Ouderenzaken cu tur e problemanan cu bo tin cu nos grandinan, y por keda bay na Sociale Zaken y DVG, pero nos tin cu bay traha hunto.
“Nos tin cu bay traha hunto, y esey mi ta kere ta e prome paso cu e director mester tuma awo, pone tur hende na mesa, den reunion cu tur e casnan di cuido priva, controla tur e instancianan cu ta duna cuido na nos grandinan, y mi ta kere cu Directie Ouderenzaken mester sinta na mesa y wak con y kico nos por haci, pa yuda mehora e servicio di nos grandinan” Gino Goeloe a señala.
Director di Wit Gele Kruis a comenta cu nan ta papia hopi di cuido medico, pero cuido ta algo cu mester papia hopi di dje. E ta papiando hopi aña, cu mester hinca mas placa den cuido en general, pero e ta wak miyones ta bay den cuido medico.
“Actualmente, si mi wak e rapportnan di AZV y tur e rapportnan; nos ta hincando 350 miyon den cuido medico, cu ta algo bon, den hospital, ImSan, pero e cuido mes duna e grandi na cas, den SABA, ta 25 miyon. Pues, e cuido ta kedando hopi atras”, Goeloe a expresa.
Gino Goeloe a menciona cu Hulanda ta en foca hopi riba cuido y ta hincando hopi placa mes, den dje. El a bisa cu na Aruba nos envehecemento ta bayendo hopi lihe, ya caba tin 26% di nos grandinan riba 60 aña, pues tin hopi persona den edad di 60 aña, y e ta bay sigui crece, y nos ta bay haya mas persona pa sigui cuida. “Awo, si nos no hinca e placa na unda mester bay, nos ta bay haya mas casonan tristo, cu nos grandinan ta abandona den casnan den situacionnan deplorable. E ta bay bira peor”, Gino Goeloe, director di WGK a remarca.
