Hose Figaroa, lider di FTA:
ORANJESTAD (AAN) – Hose Figaroa, lider di FTA, den entrevista cu DIARIO a subraya cu e leynan laboral tey caba pues no ta algo cu mester cambia, Inspectie tambe tey caba no mas cu e no ta wordo uza y si ta haci uso di dje mes, ta masha tiki.
Figaroa a bisa cu Departamento di Labor ta suppose di tin un Cuerpo di Funcionario cu specificamente su trabao ta bay tur caminda y constata e condicionnan na pia trabao, y un bez cu tin esaki bao control ta djis por check of, a base di kehonan cu ta drenta, bay tira un control; pero, e ta kere cu ta momento si pa Departamento di Labor manda hendenan den veld, controla kico ta pasando na pia di trabao, wak kico tur no ta wordo cumpli cune, pa asina haal in, eigenlijk, e tereno cu a perde pa hopi aña caba, door di no haci control.
“Si bo wak e sistema con sindicato ta traha, e ta tuma un forma mas eficiente door cu un sindicato tin su delegado na pia di trabao, cu ta su orea y wowo eynan, unda si algo pasa via nan e sindicato ta wordo informa. Pero Departamento di Labor no tin shop-steward na pia di trabao, e tin cu saca su funcionarionan y manda nan. E beneficio cu Departamento tin cu nos no tin ta cu nan tin autoridad legal pa haci control”, Hose Figaroa a señala.
El a agrega cu un funcionario of controlador di Departamento di Labor por yega na pia di trabao, exigi cierto informacionnan, cual sindicato por haci pero na un forma diferente, sea dialogo of negociacion, pero no tin autoridad pa yega y exigi informacion, locual Departamento di Labor si tin.
“Mi ta kere e ta algo cu mester bay tackle. No ta prome biaha cu nos ta menciona esaki pero como sindicato nos ta haci locual nos tin autoridad pa haci, y esey ta: na momento cu e trahado afilia nos por interveni, pero di otro banda, Departamento di Labor cu tin autoridad legal, mester haci un esfuerzo mas grandi pa pro-activamente, bay na empresanan y controla”, Figaroa a bolbe reitera.
El a referi na e caso di un hotel cu tin den construccion aworaki, cu mil y un cos tabata bayendo malo, pero si e control no tuma lugar, dificilmente e informacion ey ta yega na Departamento di Labor.
“Esaki pasobra e trahado ta bao presion, no facilmente por ta tin trahado cu no tin permiso, ta ilegal of tin un permiso cu no ta pa e trabao cu e ta eherciendo eynan. Pues, di mes dificilmente nan ta bay acerca un departamento gubernamental, pasobra e ta pensa cu si bay entrega un keho, su mañan Warda Nos Costa ta bay cune. Dus, tin un drempel adicional mientras cu bo tin e deber di haci control, pa evita e tipo di cosnan asina”, Hose Figaroa, presidente di STA, a remarca.
