Presidente di Asociacion di Fisioterapista Mimi Ponson:
ORANJESTAD (AAN) – Mimi Ponson, Presidente di Asociacion di Fisioterapista, den entrevista cu DIARIO a comenta cu nan no a sinta mas cu AZV pa elabora riba e problema cu nan tin, pero si a sinta cu e Fisioterapistanan local, cu ta riba lista di spera pa cuminza traha, nan ta bon studia pero no por traha, locual ta hopi lamentable.
Ponson a bisa cu si e no ta ekivoca ta ocho profesional nan ta. Mimi Ponson a subraya cu sin duda, nan por uza alomenos dos terapista mas.
E dama a splica tambe cu nan ta mara na e cantidad di sesion cu nan por haci pa aña, cu despues di tal cantidad nan no por duna mas pasobra nan ta mara na un presupuesto, y si nan surpasa esaki no ta wordo paga.
Otro aspecto cu el a trece dilanti ta cu e gastonan den e practica tur ta subi di prijs, pasobra tur cos ta aumenta y cada bez ta bira mas dificil pa e fisioterapistanan mantene nan mes na e reglanan cu tin y pa mantene e calidad di cuido medico. Recapacitacion pa nan ta hopi dificil tambe; bay afo tuma curso ta costa hopi placa y AZV ta rekeri di nan tuma cierto cantidad di curso den dos aña di tempo. Esaki ta fastioso pasobra si nan no tin e placa pa haci tur e cosnan aki, e calidad den cuido medico tambe ta bay atras.
Si nan papia di mas sesion, pa wak mas hende den un aña lo ta ok, pero mester tene cuenta cu na dado momento e calidad tambe ta bay baha pasobra nan ta bay cansa.
“No lubida, nos ta traha henter dia akinan, ora nos ta bay cas nos tin full un administracion pa haci. Pasobra mi ta mi so, mi no tin secretaria, pues ora mi ta caba akinan mi ta bay cu mi papelnan cas, unda mi ta sigui cu mi administracion”, Mimi Ponson a señala.
El a subraya cu si tuma mas pashent ta bon, pero mester tene cuenta cu nan tin hopi trabao extra pa haci tambe, y esaki ta un situacion cu ta andando y nan ta haci nan best pa toch yega na un solucion mas lihe posible, y nan ta wardando riba AZV y e ta spera cu nan lo reacciona lihe.
