Carlos Sanabria, Coordinador di e Diaspora Venezolano Uni na Aruba:
- Y recauda fondo pa un bon causa
ORANJESTAD (AAN)-- Señor Carlos Sanabria, a indica den entrevista cu DIARIO, cu e Venezolanonan di e “Diaspora Venezolano Uni na Aruba”, ta sinti cu e momentonan ta pa e evento cu ta wordo organiza, ta pidi pa e comunidadnan na Aruba, en general, pues di tur nacionalidad (tin 140 nacionalidad aki na Aruba), pa uni den e causa aki.
“Nos ta hopi gradici, pasobra den otro eventonan dianan pasa, cu nos a haci recaudacion di cuminda, diferente articulo medico, suppliers, cu nos a manda via barco, nan a colabora. Pero door di e costo di e barco y dificultadnan pa manda na Venezuela, nos ta haya hopi contratempo, pa yega, y door di tur esaki, nos a dicidi e biaha aki di haci un evento ainda mas conoci caba, manera e Arepazo”, Sanabria a señala.
El a expresa cu semper, normalmente, nan ta purba di uni e pueblonan Latino, e residentenan Venezolano, pero cu e evento aki nan ta bay recauda fondo pa manda pa tur e victimanan di e teremoto di Venezuela y di Colombia.
“Ora cu nos tabata recaudando pa Venezuela, e pueblo Colombiano a uni asina bunita cu nan a yega cu flanelnan di e Seleccion Colombia, y a bisa “nos ta Colombia, nos a bin yuda boso, rumannan, y esey nos ta gradici infinitamente”, Carlos Sanabria a expresa.
“Y 30 dia despues cu e teremoto na Venezuela, nan a haya tambe un teremoto, nos ta dispuesto tambe pa mustra e mesun cooperacion cu nan a duna nos, nos kier duna nan bek. Esey ta e intencion di e evento”, Sanabria a subraya.
El a remarca cu sin sponsors esaki lo no tabata posible, y e kier a duna un gradicimento hopi grandi na lugar unda e evento ta bay tuma lugar, cu a proporciona nan e espacio pa organiza e evento bunita aki y asina el a menciona varios comercio cu ta patrocina esaki, y ta invita henter comunidad pa bin come dushi arepa, pa un prijs modico di entrada y participa den hopi premio.
