Haydee Henriquez, President di Wilhelmina Fonds:
ORANJESTAD (AAN): Fundacion Koningin Wilhelmina Fonds Aruba (KWF) ta sigui hunga un papel importante den promove conscientisacion, cuido di pashentnan y prevencion di cancer na Aruba. Mediante educacion, informacion y actividadnan comunitario, e fundacion ta traha continuamente pa trece mas conocemento riba e enfermedad aki, ofrece sosten na famianan afecta y contribui na reduccion di e impacto di cancer riba nos comunidad.
Relaciona cu celebracion di su 65 aniversario, KWF ta organiza un simposio special cu lo tuma luga diasabra 14 di maart proximo, for di 6:00 te 9:00 p.m. na Aruba Marriott Resort & Stellaris Casino. Durante e anochi aki, participantenan lo ricibi informacion valioso riba diferente tipo di cancer y e desaroyo mas reciente den e area di prevencion y diagnostico.
Pa e actividad aki tin un contribucion di 35 Florin cu lo cubri e cuminda durante e anochi.
President di KWF, Haydee Henriquez, a indica cu e simposio tin como meta principal pa sigui fortalece conscientisacion y comparti informacion cu por yuda comunidad compronde miho e importancia di deteccion tempran y prevencion.
Durante e programa lo tin presentacion di diferente especialista. Dokter Daryanani lo trata e tema di cancer di pecho, mientras dokter Franca lo presenta informacion tocante cancer di tripa. Ademas, di parti di Departamento di Salud Publico (DVG), señor Maduro lo comparti cifranan actualisa riba e situacion general di cancer na Aruba.
KWF ta invita publico pa participa na e simposio aki y aprovecha e oportunidad pa amplia nan conocemento riba e enfermedad aki cu ta afecta hopi famia den nos comunidad.
