Minister Dangui Oduber:
ORANJESTAD (AAN): Recientemente, DIARIO a publica algun potret di e situacion na Malmok unda varios di e luznan ta wordo destrui door di antisocialnan.
Riba esaki, Minister di Turismo, Dangui Oduber a indica cu pa tur proyecto por wordo realisa mester bay busca ofertanan. Pa e motibo aki, e drechamento por ehempel, ta tuma mas tempo. Ta un proceso cu tin cu wordo encamina pa Oficina di Turismo, pa busca e fondonan necesario, pa pone e proyecto en marcha y pa e trabaonan cuminsa.
Ora cu nan a wordo notifica di e vandalismo ya caba a cuminsa prepara e proyecto aki y otro siman e lo cuminsa, a bisa.
E mandatario a agrega cu pa loke ta Malmok y otro proyectonan cu ta wordo vandalisa, lo a desea pa tin camaranan di seguridad poni na tur e atraccionnan cu ta wordo mas bishita. Ta intencion di gobierno pa cuminsa cu e prome fase den e area di 'hise-rise hotels' y pa durante e periodo di Gabinete Wever-Croes II cubri e areanan strategico cu ta wordo mas bishita.
El a bisa cu esey no ta e caso na e momentonan aki pa Mangel Halto. Pa esaki ta pidi cooperacion di Cuerpo Policial pa pone mas vigilancia den e areanan aki pa yuda, mientras cu ta busca financiamento pa e proyecto di camara cu ta percura di ehecuta durante e periodo di e gobernacion actual.
Pa por logra cubri tur e areanan, lo dura sigur tres aña, Oduber a duna di conoce.
