ORANJESTAD (AAN): Durante e reunionnan cu stakeholders Diaranzon mainta, Formacion Gabinete Wever-Croes II a reuni tambe cu señor Marion Agumbero di PFTSA/Meta fund/FPEF/SPHA pa papia riba tema di pension.
Nan ta representa un grupo di fondonan di pension na Aruba, esta Pension Funds Tourism Sector Aruba; Stichting Pensioenfonds META Bedrijven Aruba; Stichting Fondo di Pension di Trahadornan y Empresanan Fundacionnan Publico; Stichting Pensioenfonds Havenwerkers Aruba, cu tin cierto inkietud dilanti cu nan kier a discuti cu Formador y su equipo.
Segun señor Agumbero, un di e aspectonan ta con nan como fondonan conhuntamente por crea un cooperacion pa haci esaki factible, mirando cu tin cierto desaroyonan tumando lugar den mercado. Nan ta kere den inversionnan local y nan ta contribui y inverti localmente. Riba su mes, esaki tin su retonan esey ta loke nan kier a discuti cu Formador, specialmente riba e opcionnan cu tin riba mercado. Nan tambe a duna Formador algun idea riba posible opcionnan.
Nan tarea como fondo di pension ta pa acumula e fondonan y garantiza cu e miembro di e fondo por haya su pension garantiza.
Un otro punto cu nan a trece dilanti ta cu awo cu tin mas rekisito pa fondonan, nan gastonan di operacion ta bira mas halto y di aña pasa nan a cuminsa un discusion pa yega na un solucion structuralmente riba esaki, por ta nan lo traha conhuntamente door di bundle e fondonan.
Pesey nan ta haya importante di por a reuni cu Gobierno pa wak con nan por crea cierto opcion riba mercado, cu ta haci cu nan por garantiza cu nan por tin nan operacionnan riba un manera sano y asina sigui inverti localmente y crea mas oportunidad. Como fondo, nan tey pa sirbi comunidad y trahadornan di Aruba.
