Presidente di ODEA, Sharlyn Farro:
ORANJESTAD (AAN)—Sharlyn Farro, Presidente di e Organizacion di Enfermeria di Aruba, den entrevista cu DIARIO a elabora riba kico tur un enfermero tin cu pasa aden, pa por duna e bon cuido; pa sigui duna e mesun cuido cu amor, pasion y educacion. Esaki ta algo cu ningun hende cu no ta eherce e profesion aki, por imagina su mes.
Nan tin cu sigui educa nan mes, no keda para, pero probecha di e dos añanan di experiencia cu ta wordo exigi, y despues haci un specializacion pa por yena e necesidadnan cu tin den salubridad, señora Farro ta subraya.
El a agrega cu nan no ta resta tempo pasobra nan ta hopi druk na trabao, pero e lo a desea pa nan ta mas den comunidad. Pasobra parti di enfermeria tambe ta duna e preparacion pa bay den comunidad, pero señora Farro ta compronde tur su coleganan cu ta bisa, ora cu tin un actividad of reunion, despues di ora di trabao cu ta duro pa bolbe di cas, ora cu nan yega cansa di trabao, vooral esnan cu ta biba na San Nicolas, cu despues di yega cas no kier bin pabao bek, pa un actividad, reunion of traha den un comision.
“E ta comprendibel, e trabao ta pisa y mi ta compronde esey. Pero esaki ta cosnan cu nos tin cu haci. Ami, cu hopi placer ta hacie y cu tur amor mi ta bay sigui yuda pero mi tin cu pasa e presidencia di ODEA pa otro persona”, Sharlyn Farro a subraya.
