ORANJESTAD (AAN): Recientemente Minister Endy Croes a reuni cu Sr. Rudy Leysner, sra. Rosa Leon y sr. Harold de Miranda di e Fundacion Movemiento ta Bida.
E fundacion ta enfoca riba e bienestar di adulto mayor, treciendo diferente actividad y programa pa nos grandinan. Den e area fisico, deportivo, como tambe e parti social y educativo. E vision y mision di e fundacion ta pa por trece conscientisacion y actividadnan pa encurasha nos grandinan pa no tene miedo, semper ta activo, no para keto y opta pa biba un bida mas feliz y saludabel. Durante e reunion Fundacion Movemiento ta Bida a duna e mandatario di deporte un presentacion amplio di nan bunita proyecto C.A.A.C II, Caribbean Active Aging Congress cu ta tuma luga dia 1 y 2 di october proximo.
E obhetivonan di e conferencia ta pa trece conscientisacion y prepara Aruba y Caribe riba e poblacion cu ta embeheciendo y e problematica cu esaki ta trece cu ne sin no tuma accion awor. Como tambe aumenta e habilidad di adulto mayor pa keda activo, saludabel y pa biba independiente den comunidad. Durante e congreso lo tin orador local como tambe internacional.
E area di e congreso ta embehecimiento na Aruba, guia y sosten na ‘mantelzorgers’, realidad di ‘palliatieverzorg’ na Aruba como tambe prepara awor pa un miho mañan. Minister Endy Croes ta gradici nan pa nan bishita y e presentacion. Concluyendo e mandatario a expresa cu e ta un bunita proyecto y cu nan por conta cu sosten di Ministerio di Deporte. Hopi exito cu e preparacion pe congreso.
