Nurianne van der Griend di FDA:
- FDA ta educa muchanan na scol tocante Diabetes
ORANJESTAD (AAN) Nurianne van der Griend, miembro di Fundacion Diabetico Arubano (FDA), den entrevista cu Matutino DIARIO a expresa, cu e ta haya hopi lamentable di mira cu cada bez e edad di personanan cu ta biba cu Diabetes, ta baha.
El a comparti cu nos, cu e ta un persona cu ta biba cu Diabetes tipo 1, y den su caso e ta nifica cu su pancreas a stop di produci insulin.
“Esaki ta algo cu ainda no por splica di con e ta sosode, pero e ta un condicion medico cu e mes no tin un contesta p’e, y mudo ainda tin cu investiga.
Pero esaki a nifica cu ami mester a adopta habitonan saludabel, pa cuida mi salud y tambe pa tin un balansa den mi estilo di bida: kico mi ta come, descanso, trabao, movecion, pa cuida mi salud”, Nurianne a menciona.
Esaki ta algo cu e ta orienta y stimula tur hende pa haci den nan bida, pa evita core riesgo di Diabetes, specialmente mucha y hoben, pa evita subi e riesgo di Diabetes tipo 2, ya cu enberdad nan estilo di bida tin di haber cu e cuminda, con ta maneha stress, cu tambe por influencia con nan curpa ta reacciona, y con nan curpa ta realmente desaroya cierto condicion manera Diabetes.
“Como Fundacion Diabetes Aruba, hunto cu partnernan manera POH Aruba, y tambe gruponan den comunidad cu ta sostene nos, nos ta educa, specialmente, muchanan di scol”, Nurianne a menciona.
El a splica cu tin un programa adopta internacionalmente cu ta yama KiDS. “Kico nos ta haci? Nos ta bay scol splica e muchanan kico ta Diabetes, kico ta nifica, con nan por reduci e riesgo di haya diabetes, con nan por haci escogencia pa nan propio salud, entre otro, cuminda movecion, bebemento di awa, likido, di 8, 9, 10 aña caba, pa nan compronde cu nan tambe ta hunga un rol den nan salud y pa evita Diabetes”, Nurianne a duna di conoce.
