Solange Tchong, PR di AZV:
*Y pa esnan cu ta biaha busca nan seguro di biahe
ORANJESTAD (AAN) – Solange Tchong, Relacionista Publico di AZV, den entrevista cu DIARIO el a toca e tema di seguro di biahe, cu ta algo di sumo importancia pa tur persona y famia cu ta bay afo, pero tambe tocante e importancia di tin su AZV valido na tur momento.
Solange Tchong a señala cu di banda di AZV nan tin hopi aña ta haci intento pa keda concientiza su aseguradonan, door di splica di un banda cu AZV ta valido na Aruba so y, di otro banda, door di splica e importancia ora cu bo ta bay biaha pa exterior, pa corda cumpra bo aseguro di biahe.
“T’asina, manera nos tur sa, cu dentro di poco nos ta bay tin e vacacion relaciona cu Pasco Grandi. Un periodo hopi keri pa nos hendenan pa bay campa na Aruba, y di otro banda un periodo hopi keri tambe pa otronan cu ta gusta sali bay biaha y siña conoce tur otro pais na mundo. Dus, pa nos ta hopi importante pa tuma nota, di un banda, cu ta importante pa bo tin bo AZV na ordo, anto un invitacion pa tur esnan cu ta bay campa banda lama, cu ta hopi dushi, pero mescos cu bo ta regla bo permiso pa bay campa, corda tambe pa bo tin bo AZV app, pues bo seguro AZV na ordo”, Tchong a señala.
El a agrega cu manera ta conoci awo tin su “digizorgpas” cu ta e zorgpas digitaliza y sigur ta hopi bon pa mas hende aplica p’e. Tin un total casi 80 mil hende caba haciendo uso di e AZV app, pero falta ainda. “Kiermen, esnan cu no tin’e ainda por download esaki ainda pa aplica p’e”, el a subraya.
