Liberato Hoek di Departamento di Ambulans
ORANJESTAD (AAN): Liberato Hoek, di Departamento di Ambulans a duna di conoce cu nan ta bay duna nan apoyo total na e plataforma cu ta bay wordo lanta pa loke ta e problema di mucha pa cu kinderopvang den e parti medico.
Hoek a agrega cu na Ambulans tin proceduranan cu nan ta sigui y ta proceduranan cu ta para den nan protocolnan. Tin algo importante y esey ta e 'Pediatric Chain of Survivor'. E ta un sistema di cadena cu tin stapnan cu mester wordo sigui.
E prome stap den e cadena aki ta prevencion. Si ta pone mas atencion na prevencion hopi cos por wordo evita, a remarca.
Despues ta sigui cu e yamada. Akinan tin un parti basico y un parti avansa. E parti basico ta duna cuido medico y e prome parti di dje ta e yamada na 911. "Ta hopi importante pa na momento cu bo constata cualkier emergencia cu tin di haber cu mucha, pa yama 911".
No por ta asina cu ta yama otro hende y ta laga e yamada pa 911 te na ultimo, e subraya.
Ora di yama 911, si e persona no sa kico pa haci, e centralista di 911 por guia den e proceso riba kico mester haci den spera di ambulans, Liberato Hoek a splica.
E parti avansa ta caminda ambulans ta yega y ta tuma e cuido over. Ta trata di proceduranan importante cu mester wordo haci, principalmente ora ta trata di un mucha.
Automaticamente despues ta pasa na e otro stapnan di cuido medico mas avansa na hospital, a agrega.
El a pone enfasis riba e hecho cu personal di kinderopvang mester por ta getrain pa duna cuido na e prome minuutnan den cualkier tipo di incidente. Den pasado tabata tin casonan unda hendenan a keda warda te ora ambulans ta yega y te na e ora ey algo ta wordo haci. E or'ey por ta hopi laat caba, a remarca.
