Terry Gumbs di Mayornan di Muchanan Special
ORANJESTAD (AAN): Un grupo di mayor di muchanan special a reuni cu Formador pa asina trece nan puntonan dilanti pa loke ta trata desaroyo di un mucha cu necesidadnan special. Señora Terry Gumbs a bisa cu ta importante pa e siguiente gobernacion tene na cuenta cu e muchanan aki. E tambe a indica cu nan ta bay lanza un plataforma pa tur mucha special.
El a splica cu ta hopi importante pa un mucha special por tin 'early stimulation' como tambe 'early detection'. Hopi biaha e deteccion di un mucha special ta tuma lugar hopi laat. Si un mucha por wordo detecta hopi mas trempan, e early stimulacion por kick-in y por cuminsa yuda den desaroyo di e mucha segun su necesidad, hopi mas trempan.
E no por a enfatiza mas riba importancia di duna guia na mayornan si nan tin un yiu special, manera na unda nan por acudi y kico nan mester haci y sostene nan na tur forma. Educacion, inclusion, actividadnan y naschoolse opvang. E grupo di mayor tambe a papia riba parti medico, di bijstand, na momento cu un mucha ta bira grandi y kico lo pasa cu nan. Kico Gobierno lo por haci pa yuda e muchanan aki, segun ley, pa yuda nan den tur fase.
Señora Gumbs a bisa cu nan a haya hopi pregunta di parti di Formador y esnan presente, y nan a conta nan experiencia como mayor di un mucha special. Nan sa cu tin hopi mayor na Aruba cu mester di hopi guia y informacion. Señora Gumbs a bisa cu un mucha special ta un angel cu Papa Dios a duna cada mayor y nan ta 100 porciento para nan tras.
