Franchesca Heinze di ATHA:
ORANJESTAD (AAN): Awe diasabra 18 di juli, Asociacion Trabao di Hubentud na Aruba (ATHA), tin un curso titula ‘Training Seguridad Social’. Franchesca Heinze di ATHA a splica cu e iniciativa aki ta bin di un peticion di un organisacion di Hulanda na ATHA, relaciona cu miembronan cu ATHA ta sostene durante periodo di vakantie cu un vakantie camp. Señora Heinze a splica cu ATHA a tuma e oportunidad di biaha pa asegura tambe cu tur boluntario, esnan cu ta guia mucha y hobennan, sea mayornan, tanta, organisacionnan entre otro, por haya conocemento pa guia mucha of hoben.
Entre e training cu lo duna, tin e parti di nutricion y kico ta necesario pa salud pa mucha y hoben. Tambe lo enfoca riba con pa atende cu prome auxilio (EHBO). Lo brinda informacion tambe riba e trendnan actual y hopi preocupante cu hobennan facilmente ta cay den nan manera vaping y droga. Tambe lo enfoca riba e tema di abuso, con pa reconoce señalnan di abuso y con pa atende cu e mucha y hoben cu a pasa den un abuso hunto cu su famia y instancianan concerni.
Señora Heinze a indica cu e training ta pa cualkier persona cu tin interes den guia muchanan y hoben pa nan bienestar. Hobennan lider tambe por participa. Edad di participacion na e training ta di 14 aña bay ariba. Despues di e training aki, participantenan por bira miembro boluntario di un organisacion di ATHA y tambe boluntario di organisacionnan unda cu ATHA ta miembro.
ATHA ta invita tur esnan interesa pa e ‘Training Seguridad Social’ cu lo tuma luga diasabra 18 di juli, na Club Don Bosco na Noord, for di 8:00 di mainta te cu 12:00 di merdia. Entrada ta gratis. Por registria via e link riba pagina di Facebook di ATHA. Esaki ta importante pa tin nomber corecto pa asina na final di dia, participantenan por ricibi nan certificado di participacion.
