Dalgis Montalvo coordinador di Hunto:
ORANJESTAD (AAN) – Dalgis Montalvo, Coordinador di Stichting Hunto, a declara den un entrevista cu DIARIO, cu ta great pa wak loke a wordo logra, por ehemplo FADA pa loke ta e aspecto preventivo, Stichting Hunto pa loke ta salud mental basico, y tambe Respaldo pa loke ta trata salud mental specializa.
Montalvo a subraya cu hopi biaha tabata papia tocante e desunion of competencia, pero ta great pa constata cu e instancianan ta trahando hunto. “E ta un tarea sumamente grandi, no solamente aki na Aruba, pero internacionalmente.
“Mi ta kere cu nos, como e instancianan mas grandi cu ta trahando riba salud mental na Aruba, cu nos por a yega na otro, cu nos por traha cu otro, y cu nos por tin un miho comunicacion, pa nos ta e parti importante. Y ora bo tin esey por bay na e siguiente stap, cu ta inventariza kico ta e problematica cu tin na Aruba, pa loke ta trata e salud mental”, Dalgis Montalvo a señala.
Dalgis a reitera loke FADA a trece dilanti, cu tin e parti di e hobennan cu hopi biaha ta nan so, e hendenan grandi den cas nan so; pues, ya caba tin inventarizacion di kico tur ta e problemanan y aworaki cu nan tin salud mental, mas of menos, un bista riba dje, kico ta e problematica y na unda e instancianan ta pega, unda tin cierto camindanan cu nan ta kedando dekort; y por wak ademas, cu den e parti di onderwijs tambe tin cierto problematica, Dalgis a indica.
Esey ta haci cu ya caba un mucha por presenta cierto comportacion eynan, y si no dun’e e atencion necesario na edad jong, esaki ta pone cu e lo bay den un problema di salud mental, den un fase di su bida.
Dalgis Montalvo a bisa cu di parti di Hunto nan tin hopi trabao y e tema di adiccion cu den principio ta un tematica grandi di salud mental. “Y pa nos ta importante pa trece no solamente na comunidad, pero na gobernantenan y na esnan trahando riba salud mental, pa compronde y acepta cu adiccion tambe ta forma parti di salud mental”, Dalgis Montalvo a bisa.
