Ivo Valdez, President di OPPA:
- Si nan ta traha tin cu paga extra belasting
- Un mina di inteligencia nan ta benta afo
ORANJESTAD (AAN) Den entrevista cu president di OPPA (Organizacion di Pensionadonan Publico y Priva), señor Ivo Valdez, el a menciona cu e interes di e pensionadonan pa sigui haci algo, despues cu nan ta baha cu pensioen tey, pero gobernantenan mes a kibra a kibra e deseo di e pensionado pa sigui traha, pa comunidad di Aruba.
El a subraya cu nan por traha na diferente caminda, pero si nan bay traha pa yuda y despues ta duna nan un belasting extra, hopi di nan no ta bay haci e trabao ey.
Kico nan ta bay haci e ora ey ta trabaonan boluntario, por ehemplo skirbi, of aporta na un otro caminda, pero nan no ta para keto.
“Mientras cu si gobierno ta sabi, pasobra ta un mina di inteligencia bo ta tira un banda, den un rato di ora, siendo cu bo por haci uso di nan te na final. Pero bo por bira conciente cu na luga di importa trahado, anto bo no sa ken bo ta trece aki riba, haci uso di e pensionadonan te ora nan kier y bo tambe por afford pa locual nan ta haci den e trabao cu nan ta eherce”, Ivo Valdez a señala.
Tocante e reto cu sector Horeca ta enfrentando aworaki, cu no tin suficiente hende pa traha p’e, Valdez ta kere cu e pensionadonan bon por guia e generacion actual di trahadornan.
“Ami mes a traha 37 aña y mey na scol, pero mi ta haya mi ta sali pasobra mi no por traha pasobra riba dje mi ta haya extra belasting pa paga, anto no ta esey so, si bo traha bo ta haya un loonbelasting y na final di aña bo ta haya e extra cu ta bin acerca. Esey no ta atractivo pa un pensionado sigui traha.
“ Anto, e hendenan aki, mi ta papiando di e pensionadonan cu tin añanan di experiencia, por traha na scol, duna guia na e docentenan nobo tambe, por traha den restaurantnan, y tin mil y un manera pa nan yuda. Anto, nos no ta haci bon uso di nan, y esey ta di lamenta!”Ivo Valdez a expresa.
Ivo Valdez, pa finaliza e entrevista aki, a indica cu OPPA tin actividad pa e miembronan, henter e aña.
“Nos, tur aña ta traha un presupuesto cu ta dedica tambe na un set di actividadnan pa henter e aña. Nos no tin problema cu esey. Riba dje, nos tin un Comision di Actividad cu ta trahando hopi bon pa OPPA. Locual nan a presenta pa celebracion di Himno y Bandera, ta obra di e Comision di Actividad, cu ta parti di e programa di aña. Dus, nos tin cen aparta pa cada actividad. Logicamente, nos ta haci’e di un forma limita, pasobra ta 10 florin e miembronan ta paga pa luna, pero si nos tin mas suma di placa nos ta haci actividad mas grandi. Toch hopi miembro ta bin”, Valdez a bisa, y a gradici OPPA su Comision di Actividad, cu ta bao guia di señora Hernandez, y nan ta haci, constantemente, un bon trabao.
