Jesseline Kelly, PR di DAS:
ORANJESTAD (AAN) – Jesseline Kelly, Relacionista Publico di Departamento di Asunto Social (DAS), a sigui elabora tocante e personanan cu a haya trabao, pero no por maneha nan entrada, y indica cu por ta cu ta hendenan cu a keda un tempo sin entrada, unda ya caba nan debenan a cuminza acumula.
E ta un combinacion di a haya trabao pero e entrada ta mas abao cu locual e persona ta custumbra cune, y eynan ta caminda e ta trece retonan pa nan famia: con pa siña maneha e entrada mas abao aworaki, cu e debenan cu a acumula. “Anto, e ora ey DAS ta intermedia, por ehemplo, na FCCA, na companianan di utilidad, na instancianan cu ta yuda cu pakete di cuminda, pero importante ta e aspecto di compromiso di e famia. Dus, e compromiso pa sigui e plan di guia pa asina nan por sali for di e situacion”, Kelly a señala.
El a agrega cu hopi famia ta djis bay DAS, nan ta haya cuminda, nan ta bay, pero nan no ta cumpli cu e plan di guia. “Anto, ta importante pa bo cuminza cune, y termina cune. Ta bon pa nan hiba e tips y consehonan cu nan ta haya pa den futuro nan por evita di cay bek den un situacion asina”, el a subraya.
Jesseline Kelly a splica cu, prome cu DAS haci un plan di guia, nan ta haci bishita na cas di e famianan cu ta acerca nan cu nan necesidad. Kiermen, nan ta mantene contacto continuamente cu e famia pa mira kico ta eigenlijk, e necesidad y e trahadornan social tin gruponan priva, cu nan trahadornan social sa cu ta yuda cu cosnan mas specifico, vooral ora ta trata mucha, pasobra tin casonan di mucha tambe cu ta acudi na DAS.
DAS tin contacto cu instancianan y gruponan priva cu ta yuda no solamente cu cuminda, pero kizas famianan cu no ta den bijstand, pero cu e placa no a yega pa paga e contribucion di mayornan na scol, pa paga scol geld, pa cumpra cosnan basico cu e muchanan mester pa scol. DAS no ta haci propaganda pa esaki, pero tur aña tin cierto famianan, segun ora cu e trahador social ta filtra su casonan y ta wak e muchanan den cierto famianan, anto nan ta haya ayudo di diferencia instancia cu ta bin cerca nos, y cu ta haci e donacion via Sociale Zaken.
Jesseline Kelly a subraya cu hopi biaha tin famia cu ta acerca diferente fundacion, pero DAS si ta monitor mas esey.
Si e famia ta haya cerca DAS material di scol, e ta haya na otro instancia ayudo pa paga school geld, por ehemplo. DAS ta atende cu esaki vooral na comienzo di añanan escolar nobo.
E cifranan di e necesidadnan ta bahando, pero ainda ta den un temporada delicado pasobra aunke famianan ta hayando trabao, e lo tuma su tempo pa nan por hala rosea y bisa cu nan a cumpli cu e debenan cu nan tabata tin.
