ORANJESTAD (AAN): En conexion cu e conmemoracion di 160 aña di abolicion di sclavitud den Reino Hulandes,
Gobierno Hulandes a aloca 2 miyon euro na dos fondo Hulandes: Mondriaan Fonds y Fonds voor Cultuurparticipatie.
E fondonan disponibel ta destina pa proyectonan of iniciativanan cu lo trata riba conscientisacion tocante e historia, abolicion y efectonan di sclavitud den Reino Hulandes. Minister Xiomara Maduro ta informa cu Aruba tambe ta bin na remarca pa haci peticion di e fondonan aki.
Pa e motibo aki, den un colaboracion entre Ministerio di Cultura hunto cu e grupo di trabou Comision Conscientisacion Sclavitud di Aruba, Biblioteca Nacional Aruba, Mondriaan Fonds y Fonds voor Cultuurparticipatie lo organisa un tayer informativo y interactivo tocante e fondonan disponibel durante e aña di conmemoracion ‘herdenkingsjaar slavernijverleden’.
Durante e tayer lo splica mas amplio di con e areglo di e fondonan ta hinca den otro, puntonan di consideracion ora di haci peticion, miho practicanan ‘best practices’, y otro consehonan practico ‘tips & tricks’.
Minister di Cultura ta invita tur esnan cu tin un idea of proyecto en conexion cu conscientisacion di sclavitud na Aruba pa participa y ricibi mas informacion na e Tayer Fondonan Hulandes Disponibel Pa ‘Herdenkingsjaar Slavernijverleden.’
E sesion lo wordo brinda door di e conseheronan cultural sra. Gyonne Goedhoop, sra. Dyonna Benett y sra. Tibisay Sankatsing Nava. Esaki lo tuma luga riba diabierna, 24 di februari 2023, di 9’or di mainta pa 1’or di merdia na Biblioteca Nacional di Aruba den sala Diamante.
E tayer lo wordo duna na papiamento y ingles. Entrada ta gratis. Pa participa mester registra prome cu 22 februari riba Eventbrite ‘Tayer Fondo Slavernijverleden’.
