Rafael Perez Guardiola, coordinador, a splica:
ORANJESTAD (AAN) – Rafael Perez- Guardiola, coordinador di e carera Turibana Race di IBiSA, a amplia informacion den conferencia di prensa tocante e evento aki, y tambe a referi na e “Duo team gubernamental”.
El a reitera cu e carera aki ta bay tuma lugar di 7 di September venidero. E ta cuminza pa 6’or di mainta, dilanti di Panaderia del Campo na Turibana.
Pa e muchanan e carera ta bay cuminza pa 7’or di mainta, y ta importante pa e mayornan tene cuenta cu e informacion aki y keda pendiente di IBiSA su facebook page.
Pa loke ta trata e relay team, e ta haci un peticion encarecidamente na tur team di relevo pa ta trempan, pasobra pa 5.30 or e bus ta bay sali pa hiba nan na e relay point. Lo tin transportacion pa despues hiba nan na e finish point.
E ta pidi pa e participantenan registra prome cu 5.15 am pasobra e bus ta sali 5’or y mey.
Encuanto e water postnan cu ta bay tin, Perez a menciona unda nan ta bay ta situa. No por sa con e clima ta bay ta, pero normalmente e ta basta humedo, y nan ta deshidrata lihe, y e seguridad di e participantenan ta na prome lugar.
“E prome water-post ta bay ta na Tanki Flip, dilanti di Nikkei Sushi, e di dos na Shiribana dilanti di Tao Bao, e di tres na Veld Vito Italia, y e di cuater rond di Flatstone. Den cada water-post tin un baño. Na haltura di Tao Bao ta bay ta e 'relay point'. Akinan e coredor di duo team cu tin e banchi ta bay para pa duna e otro coredor e banchi chip, p’asina sigui bay finish” Rafael Lopez a splica.
El a agrega cu e motibo pa ta trempan ta pasobra tur duo team ta bay ricibi un chip, cu tin cu wordo registra y esey ta bay tuma tempo.
