Minister Glenbert Croes a revela: *Esnan indocumenta lo tin oportunidad pa integra legalmente den mercado laboral
ORANJESTAD (AAN): DIARIO a tene un entrevista cu Minister Glenbert Croes relaciona cu e maneho di integracion den e asina yama 'periodo post pandemia'.
E mandatario a duna di conoce cu pa loke ta su maneho di integracion, Aruba ta bay ta den un recuperacion economico unda cu ta bay bin hopi proyecto y desaroyo unda cu ta bay duna oportunidad pa e yiunan di tera haya trabao prome, pero ta bay tin necesidad di trahadornan califica y bon trahadornan di exterior.
E politica di integracion cu Aruba ta hiba ta cu esnan cu ta ya caba na Aruba, pero cu a keda ilegal pa via di e situacion na Venezuela, den e caso di e venezolanonan, of door di e pandemia, ta pidi dunadonan di trabao pa en bes di trece stranheronan cu ta den exterior, pa duna un oportunidad na tur esnan cu ta akinan caba.
"Si nan tin un luna ilegal, un aña ilegal of un par di aña ilegal, si nan ta fit e perfil laboral, nan ta pasa door di e proceso y si nan ta califica, nos ta duna nan permiso y si den un dado momento, si pa nan prome permiso mes nan tabata ilegal, nan por warda e permiso na Aruba", Minister Croes a remarca.
El a enfatisa cu e mester formalisa esaki den maneho, pa locual e mester formalis'e tambe den instruccionnan di maneho na nivel di DIMAS pa asina instancianan y autoridad respeta e vision y e palabranan cu e minister a expresa akinan.
"Nan por ta bunita palabranan, nan por ta bon palabranan, pero si nan no wordo formalisa den maneho y respeta pa nos instancianan di autoridad, anto mes leu nos a keda. Anto bo ta haya e confusionnan ey e ora", a remarca.
E mandatario a sigui bisa c'un di e puntonan fundamental cu e ta bay formalisa ta unda cu awe ainda, e instancianan ora di cuminsa un proceso di trayecto di solicita permiso, den un trayecto previo na DPL, nan no ta reconoce esey como un proceso. Nan ta bisa cu ora di yega DIMAS, nan ta reconoc'e como e comienso.
Minister Croes no ta di acuerdo cu esaki. Un bes un persona cuminsa e trayecto na DPL, ya caba a cuminsa cu e proyecto di solicitud di permiso. Pa locual, e interpretacion ey tambe mester formalisa den e instruccionnan di maneho pa asina e instancianan di autoridad tambe ta na altura di dje y pa respet'e.
E persona stranhero cu ta biba na Aruba y cu no ta purbando di legalisa su estancia na Aruba, e ora Guarda Nos Costa lo mester atende cu ne, a splica.
'Pero, nos kier pa tur ciudadano cu ta purbando di legalisa su estancia wordo brinda e oportunidad pa haci esaki pasobra ta na interes di Aruba pa en bes di e trahador traha ilegal, e traha legal y paga su impuestonan, primanan y yuda cu e desaroyo di Aruba legalmente", Minister Glenbert Croes a declara.
