Minister Dangui Oduber:
*Aruba ta e di dos pais na mundo cu a recupera du turismo mas lihe
ORANJESTAD (AAN): Minister di Turismo, Dangui Oduber a duna di conoce cu e cifranan di turismo ta mustrando mihor di loke a spera.
El a laga sa diahuebs den un rueda di prensa cu ta mira cu den luna di october 2022 a experencia un recuperacion di 105 porciento den comparacion cu october 2019. Aruba a ricibi 83.404 turista 'stay over'.
E mercado di mas importante cu ta e mercado americano a experencia un recuperacion di 105 porciento locual sigur ta algo remarcabel, mirando con Aruba a pasa den dos aña hopi dificil, con lihe Aruba a recupera y con lihe a bin ta recuperacion turismo, a indica.
Minister Oduber a expresa cu esaki a demostra un resiliencia enorme cu e 'exit strategy' cual tabata un strategia hopi agresivo cu ta dunando resultado.
Segun e proyeccionnan di Oficina di Turismo, pa luna di November y December 2022 lo pone cu lo cera aña c'un recuperacion di 100 porciento. No obstante cu e hecho cu den e lunanan di Januari y Februari tabata lunanan cu a habri diferente di loke a proyecta pa motivo di e variante Omicron.
"Pero nos ta hopi contento y satisfecho cu nos ta bay logra cera e aña manera nos a proyecta c'un recuperacion di 100 porciento", Dangui Oduber a declara.
Aruba ta e di dos pais na mundo cu a recupera du turismo mas lihe, a finalisa bisando.
