Jessica Ras di SVT:
ORANJESTAD (AAN) Despues di tres siman di Formacion Social (SVT), ya por observa cambio positivo den e hobennan cu ta participa den e trayecto. Sinembargo, e proceso di formacion no ta uno facil y ta exigi disciplina, perseverancia y disposicion pa cambia.
Señora Jessica Ras di SVT a splica cu e grupo inicialmente tabata consisti di 21 hoben, cada uno cu su propio caracter, background y motivacion pa participa. Pa guia e hobennan aki den e mesun direccion ta un proceso cu ta exigi hopi dialogo y pasenshi.
Di e 21 hobennan cu a inicia e programa, cinco actualmente no ta forma parti di e trayecto mas. Algun a wordo retira pa falta di cumplimento of pa comportacion cu no ta cuadra cu e exigencianan di e programa. Otro a dicidi di sali despues di conclui cu SVT no tabata e trayecto cu nan realmente ta traha pa nan.
Segun Ras, nunca ta facil pa tuma e decision di retira un hoben for di e programa of permiti’e pa bay cas. Tin hobennan cu ta ricibi mas cu un oportunidad pa mehora nan comportacion y actitud. Sinembargo, ora no tin cambio, un actitud negativo por influencia y demotiva e resto di e grupo.
Ora un hoben expresa cu e kier bandona e programa, e team di SVT ta dialoga cu ne y purba di motiv’e pa e keda. Ex-participantenan cu a completa e trayecto y actualmente ta militar tambe ta comparti nan experiencia cu e hobennan, pa mustra nan cua oportunidadnan e programa por brinda.
“Nos no ta renuncia riba un hoben asina facil. Nos ta duna varios oportunidad. Pero si nos mira cu no tin cambio di actitud y cu e hoben no tin e deseo pa continua, nos no por oblig’e pa participa. Den tal caso, nos ta tuma e decision pa laga e hoben bay cas of retir’e for di e programa pa motibo di mal comportacion,” señora Ras a remarca.
Mientras tanto, e hobennan cu ta sigui den e trayecto ta ricibi e tempo, guia y sosten necesario pa siña, mehora nan comportacion y desaroya un actitud mas positivo.
“E grupo aki ta bayendo bon. Ta trata di un ‘work in progress’, den cual nan ta traha riba nan puntonan di mehoracion y, na mes momento, fortalece nan cualidadnan positivo. Nos ta sigui traha cu nan, tambe riba nan bienestar mental,” Ras a expresa.
Aunke e proceso ta exigi hopi dialogo y pasenshi, SVT ta sigui comprometi pa guia y stimula cada hoben cu ta dispuesto pa traha riba su mes. E meta ta pa nan completa e trayecto cu exito y sali for di e programa cu mas disciplina, confianza y instrumento pa construi un futuro positivo pa nan mes.
