Edwin Jacobs, director SVb:
ORANJESTAD (AAN) – Edwin Jacobs, director di SVb, den entrevista cu DIARIO a elabora tocante e controlnan na pia di trabao cu e institucion aki ta haci. Desde cu aña a cuminza SVb tin e controlnan regular, tanto durante e oranan di oficina di SVb como despues.
“Nos a identifica e camindanan unda tin biaha tin incumplimento di e Ley di Seguro di Malesa y Accidente, cu ta den e sectornan di construccion y Horeca, ora e traha despues di oranan di oficina.
Esey sigur, tur luna nos tin un control atardi anochi den Horeca pa wak e incumplimento, y berdad ta cu nos ta topa na pia di trabao, trahadornan cu no ta asegura, y nan ta bay ta hayando e multa corespondiente tambe.
“Solamente nos no ta controlando den ekipo pasobra esey ta hopi dificil pa coordina, pa bo ta agil pa forma un ekipo cu Departamento di Impuesto, Labor, Warda Nos Costa, pero na final di dia ora nos ta yega na constata algo, cu e trahado no ta asegura, nos ta busca mas informacion y sigui. Den grupo tin ora ta mas dificil pa coordina y di otro banda cada un tin un tarea pa cumpli cune y esey ta haci nos coordinacion ey mas dificil”, director di SVb a señala, agregando cu SVb ta continua cu nan controlnan, pasobra apesar cu a constata cu Aruba su economia a alcanza e nivel di 2019, e cantidad di trahadornan inscribi na SVb no a yega 2019.
Jacobs a indica cu di un banda nan ta depende di e control pero di otro banda nan ta depende di e trahado mes. “Momento cu bo sinti cu no ta controla por tuma contacto cu SVb y despues cu nos ta verifica ken ta bo persona, nos por check tambe si bo ta asegura cerca nos”, Jacobs ta indica.
Jacobs a bisa cu esey ta awo, pero tambe nan tin cu traha na un manera structural pa nos garantiza cu den futuro, no ta depende solamente di control.
“Pesey tambe nos a aproba y ta den desaroyo aworaki, un app pa trahado, mediante e app eynan, ora cu e bay den uso nos ta spera cu e ultimo cuartal di aña, tur persona cu ta trahado por subi su app y wak si su donador di trabao a registre na momento cu el a cuminza traha. Esey ta pone cu bo tin e control di tur dos banda. E ora ey bo ta registra pero bo no sa. E tin cu bisa bo of mustra bo via e web-portal cu bo ta registra, of bo tin cu contact SVb pa bo haya sa cu bo ta registra como trahado”, director di SVb Ir. Edwin Jacobs a señala, agregando cu na momento cu e app aki bin den uso, e trahado mes por subi su app y wak si berdaderamente e ta registra, si e ta asegura cu e salario corecto, y si tur su datonan ta corecto. “Pues, esey ta e forma structural cu nos ta acercando e problema aki di incumplimento di asegura trahado”, Jacobs a reitera.
