ORANJESTAD (AAN): Ley di Aruba ta simple! Si acaso abo wordo tuma den servicio di un compania of di un persona,
e tin di registrabo na Banco di Seguro Social (SVb) pa asina bo por tin bo derechonan protehi, y cu bo por haya bo dianan di enfermedad cubri cu pago.
Director di SVb, ing. Edwin Jacobs a indica cu lamentablemente ainda tin masha hopi trahador riba e isla cu nunca a registra. Ni e trahador, ni e dunador di trabao no a haci esey.
Desde 1 di Januari 2022 te cu 27 di Juli 2022, SVb a haya 922 trahador local nobo cu a registra cerca nan. Cantidad di cupo di trabao registra a subi cu 1.338. Tambe nan a haya un total di 78 dunador nobo di trabao nobo cu a registra nan mes te cu awor den 2022.
Sinembargo Jacobs a mustra cu SVb tin informacion clave cu tin hopi trahador cu no ta registra. Pesey ta bay intensiva den luna di Augustus en adelante, despues cu vakantie caba. SVb su inspectornan lo bay haci e controlnan na pia di trabao, y pafo di oranan di trabao. Specifico nan lo mik den sector conoci pa nan cu ta emplea trahador, sin cu ta registra nan.
E ta referi aki na e.o. sector di horeca, sector di construccion, y sector di security.
Ta recomenda dunadornan di trabao, pa evita di haya boet pisa, pa mihor bay inscribi e trahadornan y cumpli cu ley. Bo por haci esey hasta riba website di svbaruba.org tambe. Esey ta un di e condicionnan importante cu tin pa ley di seguro di malesa y accident.
ing. Jacobs ta convenci cu hobennan di Aruba mester ta conciente cu nan ta traha, por socede un accident of ora di papia cu otro hende, malesanan ta presenta nan mes. Esey ta pone cu debi na malesa of accident bo no por traha, y bo tin di sigui haya salario.
