Edwin Jacobs, Director di SVb:
ORANJESTAD (AAN): Edwin Jacobs, Director di SVb, recientemente a declara na DIARIO cu SVb no tin plan pa stop control di notificacion di AO y pasa esaki pa un compania priva. El a bisa cu no tin cambionan den e sistema actual di notificacion di AO. Esakinan ta keda bou maneho di SVb mes.
SVb di otro banda, den e proceso di digitalisacion, ta pushando pa mas notificacion di AO posibel drenta via MiSVb Trahado App. Actualmente mas di 80 porciento di notificacionnan tur dia ta tuma luga via e app, un desaroyo cu, segun Jacobs, ta hopi positivo. Ta purbando pa reduci e cantidad di yamadanan pa notifica AO y motiva mas trahador uza e app.
Señor Jacobs a indica cu dunadornan di trabou por subi riba e portal aki of ta haya un email ora un empleado notifica AO. Pronto tambe, e dunador di trabou por bay den MiSVb Trahado App y por controla ken y riba ki fecha un trahador a notifica AO. Tambe pa esnan cu no ta notifica via e app, esakinan lo bay den e sistema tambe pa e dunador di trabou por tin un bista riba e grupo aki tambe.
