Ban planta!
ORANJESTAD (AAN): Durante un conferencia di prensa diaranson mainta a keda anuncia cu Biblioteca Nacional Aruba lo presenta un otro edicion di su Sustainable Education Symposium. Un evento cu tin como meta pa duna hopi informacion tocante diferente aspecto di sostenibilidad na un publico grandi, incluso alumnonan di scol.
E biahe aki e simposio ta dura un siman, for di dia 22 di april pa dia 26 di april tin diferente evento, tanto na biblioteca como na Cas di Cultura.
Durante e siman aki, parti mainta, biblioteca ta invita alumnonan di scol pa presentacionnan tocante e tema Plantamento.
Diferente orador ta duna informacion tocante e tema entre otro Rendell de Kort, Ludwig Rasmijn, Diego de Cuba, Roselinde Barros-Poels y Gregory Fung A Fat. Scolnan participante ta: La Salle College, Abraham de Veerschool, EduCampus, Mon Plaisir College, Ceque college y Maria college.
Dia 25 di april lo tin un ‘Evening of lectures’ na Cas di Cultura di 7or pa 9or di anochi. Entrada ta gratis.
Oradornan ta Rendell de Kort, Roselinde Barros-Poels y Gregory Fung A Fat. Porta ta habri 6or di atardi cu un mercado di informacion y productonan local.
