Ex-Ministro ta duna su comentario
PARAMARIBO: Tabata Diabierna 11 di Juli, cu resultado di examen a wordo anuncia na diferente scol na Suriname. Y e resultado ta mustra di ta hopi desastroso, na opinion di ex-Ministro di Enseñansa, Robert Peneux den un entrevista cu prensa na e pais Sur Americano. El a bisa cu esaki ta e punto di mas baho den historia di Suriname pa cu e resultadonan di examen.
E cantidad di esnan cu a slaag direct pa HAVO ta apenas 26,3%. Pa e alumnonan di VWO, esey ta solamente 45%.
“Ta pa prome biaha den hopi aña cu resultadonan ta asina malo. Nos a yega e punto mas baho, y esey nifica cu pa e siguiente aña escolar Suriname lo confronta algun problema. Na prome luga, e doorstroom di hobennan ta bay bira problematico pa esnan di e aña anterior pa siguiente klasnan. Mayornan lo bay confronta problema pa logra haya espacio pa nan yiunan na scol. Ami no sa con Gobierno lo bay soluciona esaki, pasobra ya caba Suriname tin un scarcedad cronico di lokaal y espacio pa studiantenan. Esaki ta un berdadero desastre,” Peneux a declara for di pueblo di Bakana Tori.
Segun e politico, e siguiente Gobierno tin di bay traha urgente riba un plan pa check con por crea extra facilidad pa por haya espacio pa e studiantenan aki. E cantidad di candidatonan cu a druip mesora for di HAVO ta 28,2%, y pa VWO esaki ta 20%. Peneux ta indica cu e cifra aki ta igual cu algun mil studiante.
E ex-Ministro ta indica cu si acaso e tabata na mando, e lo bay check opcion di bin cu Scolnan di Merdia. Tambe alumnonan di cierto edad, pues cu ya no ta hopi jong mas, por bay Scolnan di Merdia, y esnan mas hoben por atende Scol di Mainta. Esaki lo ta un dolor di cabez pa mayornan, pero si bo kier educacion pa bo alumnonan, y si Ministerio di Enseñanza ta trahando responsablemente, e ora tin di bay studia e opcionnan aki bon.
Segun e ex-Ministro, e resultadonan desastroso aki ta pa culpa di e curiculo, y tambe calidad di enseñansa.
“Nos tin un problema grandi cu nos curiculo y calidad di enseñansa. Despues di pandemia di Covid-19 no a ni traha mes pa recupera curiculo y e nivelnan. Debi na maneho di doorstroom, esaki a trece un overstroming, studiantenan cu diripiente a haya buraco den e material di les. Nos mester start traha back riba esey, pa trece un vez mas na e nivel corecto. Esaki ta un señal cla y raspa,” el a bisa.
Segun Peneux, el a mira resultadonan aki ta yegando caba, ora cu na 2020 el a comenta cu e maneho di doorstroom lo bay tin consecuencia funesto aki algun aña pa henter Suriname.
E ta kere cu e resultadonan malo aki ta consecuencia tambe di e posicion slap di Ministerio, y e ta kere cu tin di bay traha mas duro riba exigencianan di instroom di e alumno.
“Ora cu e instroom di muchanan ta debil, e ora e output tambe lo bay ta debil. Bo por tin e mihor docente, pero e lo no por bay soluciona esaki. Dirigentenan di scol tambe mester wordo observa y evalua. Pasobra desde cu e Ministro actual a cuminza traha, bo ta haya cu varios scol tin Directornan cu no tin ningun clase di experiencia pa por maneha scolnan.
Pues e resultadonan malo aki ta bay cay riba lomba di Profesor Dr. Henry Ori, e Ministro saliente di Enseñanza. Pasobra na Suriname den tur periodo tabatin crisis, pero nunca e tabata asina malo na Scolnan Secundario cu a trece resultadonan fatal asina. Ex-Ministro Peneux no ta kere cu e proximo Ministro lo por bay tover y trece cambio inmediato. Pasobra e ta bin tuma over un situacion cu a keda atras den forma di total-loss.
