ORANJESTAD (AAN): E siman aki a anuncia, cu nan ta extende e supervision finansiero pa Curaçao y Sint Maarten,
manera regla den e Rijkswet financieel toezicht Curaçao en St. Maarten (Rft, Ley di Reino supervision finansiero Curaçao y St. Maarten).
Dia 4 di October, Conseho di Ministro di Reino a disidi esaki a base di e Conseho di e komishon di evaluashon Rft 2024 pa e periodo 2021-2023. Riba Diabierna Secretario di Estado Szabó ta manda un carta y e informe di e Comision di evaluacion pa Eerste y Tweede Kamer.
Den su informe e komishon di evaluacion, cu ta consisti di expertonan independiente di Curaçao, St. Maarten y Hulanda, ta conclui cu ainda e dos paisnan no ta cumpli structuralmente cu e normanan presupuestario for di e Rft. E comision ta trece dilanti cu e pandemia di Covid tabatin un contribucion significante den esaki. No obstante recuperacion di e economia despues di e pandemia di Covid, e comision ta considera cu terminacion di e supervision na e momento aki no ta posibel. Pues, e supervision ta sigui na vigor. Un siguiente evaluacion lo tuma lugar pa mas tarda na aña 2027.
E comishon ta haci tres recomendacion importante: Desaroya un cuadro di evaluacion, haci miho uso di e posibilidadnan legal den e Rft, y garantisa institutonan independiente. Asina, e comision di evaluacion ta bisa cu e Colegio supervision finansiero (Cft) y e paisnan conhuntamente mester desaroya un cuadro cu cua por establece obhetivamente si ta cumpli cu e normanan presupuestario. Ademas, e comishon ta mustra riba e posibilidad di e paisnan pa, dentro di e normanan di Rft, por haci inversion strategico. Finalmente, e comishon ta boga pa fortficacion mas aleu di e base di e finanzanan gubernamental door di establece institucionnan fuerte, independiente.
Secretario di Estado Szabó aki a declara: “E meta di e ley ta y lo sigui ta finansanan gubernamental duradero y bon maneho financiero. Esaki ta un condicion basico esencial importante pa e habilidad di e paisnan pa nan por yuda nan mes. Gustosamente lo mi sigui traha conhuntamente cu e paisnan riba e trayecto importante aki.”
E paisnan Curaçao y St. Maarten a indica cu nan kier tin perspectiva riba un futuro sin supervision. Pa e motibo aki, Conseho di Ministro di Reino a invita e dos paisnan pa, conhuntamente cu Cft y cu Hulanda, sigui traha riba finanzanan gubernamental duradero y bon maneho financiero.
Conseho di Ministro di Reino ta eherce e supervision, mientras cu Cft tin un papel di señala y conseha. E Rft a drenta na vigor na aña 2010, y tabatin un duracion di cinco aña. Por extende e supervision, despues di evaluashon, cada biaha cu 3 aña.
