Entrante dia 1 di april 2024
*Exoneracion ta conta solamente pa articulonan y productonan di uzo personal
ORANJESTAD (AAN): Siman aki tin bon noticia pa esnan cu ta biaha pa exterior, y ta trece bek cosnan cu nan a haya na mihor prijs cumpra den exterior.
Minister Xiomara Maduro ta informa cu entrante 1 di april 2024 e suma di exoneracion di impuesto riba ekipahe di biaheronan ta aumenta di 400 Florin pa 900 Florin.
Esaki ta conta pa biaheronan cu ta trece articulonan y productonan na momento cu yega Aruba bek for di exterior. Generalmente, tur biahero tin derecho riba exoneracion di impuesto riba un cantidad limita di articulonan y productonan cu ta paga accijns.
E balor maximo riba e factura cu cada biahero tin derecho riba exoneracion di impuesto entrante 1 di april 2024 ta bira 900 Florin. Esaki ta aplicable riba entre otro, articulonan di paña, sapato, holoshi, smartphone, cos di hunga, y productonan di beyesa.
Articulonan y productonan cu tin un balor di factura cu ta surpasa AWG 900, mester paga impuesto di importacion ariba e articulo completo.
Pa productonan di accijns manera alcohol y sigaria, cada biahero por trece:
(*) 200 pida (1 slof) di sigaria, of 25 pida di siga, of 50 pida di cigarillos, of 250 gram di tabaco
(*) 1 liter di bebida fuerte p.e. rum of whisky, of 2,25 liter di biña, of 3 liter di cerbes.
Riba e productonan aki no mester paga accijns. Den e caso cu e biahero surpasa e cantidadnan aki, lo mester paga accijns riba e productonan.
E mandatario ta sigui informa cu pa bin na remarke pa exoneracion di impuesto, tur biahero:
(*) Mester tin minimo 16 aña di edad.
(*) Mester tene na cuenta cu e exoneracion ta conta solamente pa articulonan/productonan di uzo personal.
(*) Mester tene na cuenta cu pa cierto articulonan/productonan entrada ta prohibi of lo tin mester di un permiso, manera drones, remedi, mata y carni.
Minister di Finansa ta subraya cu Aduana ta haci control riba ekipahe y pa biaheronan warda e facturanan pa por calcula e balor di e productonan cu a cumpra. Pa mas informacion acudi na www.douane.aw of pagina di Facebook Departamento di Aduana Aruba.
