ORANJESTAD (AAN): Ta increibel pa haya sa cu ainda un aña despues ta tende di casonan di abuso laboral cu e doñonan di companianan ta comete cu nan trahadornan.
Parce cu tin doñonan di trabao cu ta menasando nan empleadonan y ta bisa nan cu e subsidio di salario cu nan ta haya for di gobierno nan tin cu pag'e na gobierno bek.
Wel, esey no ta e caso. Tin basta keho di trahadornan cu ta hayando menos di 60% di nan salario y cu nan doñonan di trabao ta pone mas presion riba nan bisando cu mester bay paga e placa di subsidio bek.
Mester bisa bon cla kico ta e subsidio salarial. Esaki ta e contenido cu por haya riba e website di gobierno (gobierno.aw).
E subsidio salarial ta un apoyo financiero pa e empresanan local cu a wordo afecta financieramente pa e pandemia Covid-19 y cu a sufri un perdida di ingresonan den mas di 25%.
E obhetivo principal di e apoyo aki ta mantene na pia di trabao e mayor number posibel di personanan a pesar di e perdida total of parcial di e actividad economico y garantisa e pago parcial di e salarionan.
E compania mester ta registra na SVb y na Departamento di Impuesto y ta sigui cumpli cu pagonan di impuesto y primanan social. E Subsidio di Salario cu e dunado di trabou ta ricibi mester wordo uza pa paga salario di su trahadonan y e primanan social cu dunado di trabou mester paga.
Gobierno lo duna dunado di trabou, depende di su perdida di entrada, subsidio pa paga e trahado te cu un maximo di 60% di salario registra na SVb te cu e limite di salario maximo di SVb cu ta Afl. 5.850,- pa luna.
Dunado di trabou mester paga 20% di salario y trahado lo entrega 20% di salario trahando menos ora ('arbeidstijdverkorting'). Den caso cu dunado di trabou no por paga su parti di 20% di salario e mester yega na un acuerdo cu su trahado riba e 40% di salario trahando menos ora (‘arbeidstijdverkorting’). Pues punto di bista ta cu trahado ta traha e cantidad di ora segun e salario cu e ta ricibi, a menos cu partidonan a cumbini algo otro.
E dunado di trabou cu a aplica pa subsidio di salario mester paga un salario bruto di por lo menos 60% di e salario registra na SVb. Mirando cu tur luna mester aplica pa subsidio di salario y esaki ta depende di e perdida di entrada benta, lo mester evalua e situacion financiero di e compania cada luna. Asina cu tin mas actividad economico, mas oranan di trabou y pues mas entrada, e compania lo mester ahusta e oranan di trabou y pago di salario corespondiente na e trahado.
Tene cuenta cu si un dunado di trabou no a aplica of no ta bin na remarca pa subsidio di salario e ta keda responsabel pa pago di salario na e trahado. Pa haci cambio na condicionnan laboral manera reduci e oranan di trabou y salario, e dunado di trabou y trahado mester yega na un acuerdo mutuo!
E subsidio di salario no ta lo mescos cu FASE, ni e ayuda financiero pa e empresanan chikito y mediano.
Esaki ta un di e tres programanan di apoyo financiero, cada un cu un proposito specifico y un audiencia obhetivo. Pa aña 2021 a premira pa reserva den Presupuesto di Pais Aruba e suma di 280 miyon florin pa por sigui brinda e yudansa necesario pa surpasa e efectonan economico cu e pandemia di COVID19 a trece cune.
Si bo persona ta sinti cu bo doño di trabao no ta cumpliendo cu e parti di subsidio di salario por tuma contacto cu e Service Center di SVb via email This email address is being protected from spambots. You need JavaScript enabled to view it. of via WhatsApp message 527-2801.
