Directora Anuesca Baly a splica: --- *Durante mandato di Rudy Lampe suma a wordo reduci
ORANJESTAD (AAN): E tema di aumento den schoolgeld ta sigui uno cu lo keda riba mesa ainda e siman aki, pendiente di un decision bilateral entre SKOA y Gobierno. Pakico bilateral? Pasobra SKOA, como un stichting, a dicidi di aumenta e suma di schoolgeld locual a trece hopi reaccion den veld di enseñansa, principalmente cerca e mayornan.
Na otro banda, tin gobierno, cu ta esun cu mester duna SKOA subsidio pa asina por garantisa e pago di e trahadornan di SKOA.
Riba e tema aki, Directora di SKOA, Anuesca Baly a duna un declaracion dialuna mainta durante e programa radial Entrevista di Dia cu Aldrich Croes na Hits 100FM unda el a duna di conoce cu for di aña 2020 SKOA ta bin cu e situacion cu e subsidio cu nan ta haya for di Pais Aruba.
El a bisa cu SKOA ta un fundacion cu ta brinda enseñansa y nan ta wordo subsidia door di gobierno, mescos cu cualkier otro fundacion.
E subsidio cu nan a bin ta ricibiendo for di aña 2020 a baha drasticamente. Esaki a sosode durante e cartera di Minister Rudy Lampe. Pa e motibo aki ta haya cu tin menos placa pa paga e trahadornan di limpiesa, a bisa.
Baly ta kere cu limpiesa ta un di e aspectonan esencial den cualkier instancia y scolnan, principalmente despues di Covid. Aworaki e trahadornan di limpiesa ta ricibi menos salario for di e placa di subsidio, consecuentemente SKOA a bin ta bati na porta di gobierno den diferente ocasion.
SKOA no ta un fundacion cu ta genera placa pa por cubri e gastonan. E manera pa haya fondonan ta for di e scolnan.
Anuesca Baly a haci un apelacion na Parlamento caminda cu nan a bin ta trece dilanti tambe cu esaki ta un situacion fastioso pa SKOA. Tur e otro fundacionnan a bin ta aumenta nan schoolgeld durante di e añanan caba y aworaki ta apela na e parlamentarionan pa trece esaki dilanti.
El a señala cu ya caba nan a trece esaki dilanti den e fundacion, a sinta den comisionnan. Tabata tin un solucion cu a wordo aproba den Conseho di Minister. Tin tambe un carta cu a wordo manda pa e parlamentarionan caminda ta bisa cu SKOA ta bay di acuerdo cu e solucion y pa duna na tempo pa traha riba dje.
Awor ta 8 luna despues y cu tempo ta birando mas y mas precario. Ya ta dos aña cu e situacion aki ta andando, Anuesca Baly a remarca.
