Segun Minister demisionario Rudy Lampe - *Un aspecto cu no a keda cla tabata e inversion den e maestro
ORANJESTAD (AAN): Diahuebs atardi, Minister Rudy Lampe a keda di haci entrega di e cartera di Enseñansa y Ciencia na e proximo Minister di Enseñansa y Deporte cu ta Endy Croes.
"Eynan si mi a pone como titulo 'Mision Cumpli', Lampe a señala, ya cu tin cosnan cu no por a wordo cumpli, manera e aspecto di e industria di cannabis, cu tabata un tema importante pa Fraccion di RED durante e gobierno saliente.
El a agrega cu e documentonan cu e ta entrega na e ministernan nobo, e ta entrega nan na Parlamento y un bes cu yega Parlamento, e ta bira algo publico y prensa por hay'e tambe.
Segun Rudy Lampe, e mision a wordo cumpli refiriendo na e tema di integridad. "Asina cu nos a yega como minister di enseñansa, nos a haci denuncia di diferente caso di fraude, di corupcion cu tabata tin y tambe cu nos a coregi loke nos ta yama onrechtmatig, ondoelmatig gebruik di placa di pueblo".
El a agrega cu no por ta asina aki cu mal gastamento di placa ta continua y placa cu ta contra ley, contra regla ta wordo gasta, mientras cu sa cu den mundo di enseñansa ta haci medionan financiero.
Lampe a señala cu loke el a haci ta coregi e foutnan ey pa e recursonan ey wordo hinca den innovacion di enseñansa y pa tin mas placa disponibel den 2022 pa loke ta medionan digital, pero tambe, entre otro pa limpiesa di scolnan.
Un aspecto cu no a keda cla tabata e inversion den e maestro, pasobra e plan tabata pa bin cu un maneho financiero stricto y corta mal gastamento di placa cu por tin pa hinca e placa ey den innovacion, den e mucha y den e maestro.
Esey tabata den e plan original pa na Januari 2021, pero Covid a bin y a atrasa tur e plannan aki. Pesey ta un tema cu ta keda pendiente pa e proximo minister.
