Ministro di infrastructura Rene Herdé:
ORANJESTAD (AAN): Modernisa e aparato publico, acelera proceduranan y haci servicio mas accesibel pa ciudadano ta forma parti di e vision cu Minister di Vivienda, Infrastructura, Servicio Interno y Telecomunicacion, Rene Herdé, ta implementando den e diferente carteranan bou di su encargo.
Herdé a asumi responsabilidad di e cartera na momento cu inicialmente tabata contempla como un periodo temporal. Posteriormente circumstancianan a haci necesario pa e sigui den funcion y desde e posicion aki e minister a opta pa dedica su experiencia profesional pa continua cu e trabao y impulsa mehoracion cu por laga un resultado duradero den e aparato publico.
Desde cu a asumi e ministerio, Rene Herdé a dedica atencion pa conoce e funcionamento di cada departamento y identifica unda tin proceso cu por mehora. Den e trayecto aki a constata diferente obstaculo, proceduranan cu ta tuma demasiado tempo y sistema cu no semper ta logra responde na e demanda existente y cu e rapides necesario.
Pa e minister, e realidad aki no mester wordo mira solamente como un problema, sino como un punto di salida pa modernisa e manera cu Gobierno ta traha.
E enfoke ta pa revisa proceso, elimina paso innecesario unda ta posibel, fortalece e departamentonan y haci mas uzo di tecnologia. E meta ta pa gradualmente acelera e manera di tramita peticionnan y reduci tardansa, sin compromete e exigencianan legal y administrativo cu cada procedura mester cumpli cu ne.
“Modernisacion no ta solamente digitalisa un formulario. E ta revisa con nos ta traha, unda e proceso ta stanca y con nos por brinda ciudadanonan un servicio mas rapido, transparente y eficiente,” segun Minister Herdé.
E vision aki ta extende riba diferente responsabilidadnan di e ministerio. Den Vivienda, e enfoke ta pa crea mas oportunidad y facilita solucionnan pa famianan. Den Infrastructura ta importante pa acelera preparacion y ehecucion di proyectonan necesario. Den Servicio Interno, modernisacion mester contribui na un aparato gubernamental mas eficiente, mientras cu den Telecomunicacion, innovacion y conectividad ta esencial pa prepara Aruba pa e exigencianan di futuro.
Segun Minister Rene Herdé, diferente mehoracion ta cuminsa bira visibel, pero ainda tin trabao pa haci. Precisamente p’esey, e minister ta pone enfasis riba un cambio cu ta structural y duradero, en bes di solucionnan temporal.
E meta final ta un Gobierno cu ta move cu e necesidad di su pueblo, unda ciudadano y empresario por conta riba proceduranan mas eficiente, mas transparente y un servicio publico cu ta prepara pa futuro.
Cu e transformacion aki, Ministerio di Vivienda, Infrastructura, Servicio Interno y Telecomunicacion ta pone e fundeshi pa un aparato publico mas moderno, capaz di atende e demanda acumula y na mes momento, prepara Aruba pa e desaroyonan cu ta bin.
