ORANJESTAD (AAN): Diaranson y diahuebs mainta e studiantenan di Hospitality & Tourism unit di Colegio EPI a
asisti na e conferencia ‘Voices of Tourism’ cu a tuma lugar na Renaissance Convention Center.
E conferencia aki a wordo organisa pa Aruba Tourism Authority, cu e meta pa inspira e proximo generacion di lidernan den e industria di turismo.
E conferencia a habri cu un discurso di Ronella Croes, CEO di A.T.A., kende a reflexiona ariba e importancia pa tin meta den bida. Ronella a enfatisa e importancia di determinacion, trabou duro y sacrificio pa logra esakinan.
Siguientemente e presentador internacional Trent Shelton a hiba su discurso y a comparti mensahenan inspirativo y impactante pa crecemento personal y profesional.
Tabata dos mainta hopi exitoso unda e studiantenan a wordo ekipa cu hermentnan crucial pa enfrenta cualkier reto nan dilanti.
EPI ta gradici A.T.A. pa nan esfuerso di inverti den nan studiantenan, nos futuro generacion di profesionalnan turistico!
